Otstavkanyń sebebi — psıhologııalyq sharshaý: Saıasattanýshy Úkimettiń taraýy týraly
ASTANA. KAZINFORM — Belgili saıasattanýshy Danııar Áshimbaev Úkimettiń búgin otstavkaǵa ketýin tosyn jaǵdaı dep baǵalady. Yqtımal sebepteriniń biri retinde sarapshy psıhologııalyq sharshaýdy atady.
«Úkimettiń búgin otstavkaǵa ketýi kútpegen jaǵdaı boldy. Sársenbige belgilengen Úkimettiń keńeıtilgen otyrysynda qandaı da bir taldaý bolady degen nusqalar talqylandy. Biraq Prezıdent búgin sheshim qabyldady. Eń aldymen, otstavkaǵa ketýdiń sebebi psıhologııalyq sharshaý dep oılaımyn. Álıhan Smaıylov Úkimetiniń úlesine aıtarlyqtaı úlken jumys júktemesi tústi: syrtqy daǵdarys, ekonomıkany monopolııadan aryltý qajettigi», — dep túsindirdi Danııar Áshimbaev agenttik tilshisine bergen suhbatynda.
Saıasattanýshynyń aıtýynsha, jalpy Úkimettiń jumysyn úshtikke baǵalaýǵa bolady.
«Odan da jaqsy jumys isteýge bolar edi. Jetistikter boldy, biraq kóptegen kemshilikter de oryn aldy. Prezıdent uzaq ýaqyt boıy qalypty ekonomıkalyq strategııany talap etip, birneshe ret sógis aıtqany túsinikti. Prezıdent Úkimetke búkil qajetti kart-blanshty usyndy. Biraq, juma kúni Prezıdent Joǵary aýdıtorlyq palatanyń tóraǵasy Natalıa Godýnovany qabyldaǵanyn eskerý qajet. Kezdesý týraly aqparat qysqa boldy. Biraq sonda Prezıdent qazirgi Úkimetti baǵalaý týraly tolyq málimet aldy», — dep atap ótti saıasattanýshy.
Danııar Áshimbaev qazaqstandyqtarǵa Joǵary aýdıtorlyq palatanyń tóraǵasy Natalıa Godýnovanyń ótken jylǵy bıýdjetti atqarý jónindegi esebin eske saldy.
«Biz 2021 jyly qabyldanǵan ulttyq josparlaý júıesiniń bári joıylǵanyn kórip otyrmyz. Jańasyn jasaý týraly aıtyldy, biraq sol kúıi paıda bolmady. Ekonomıkadaǵy jaǵdaı Prezıdentti komandany aýystyrý jóninde sheshim qabyldaýǵa ıtermeledi. ıAǵnı, Úkimet daǵdarysqa qarsy menedjer retinde aıtarlyqtaı qarqyndy jumys istegeni túsinikti, biraq biz qalaǵandaı jaqsy emes. Damý máseleleri artta qaldy. Josparlar mezgil-mezgil túzetilip, ózgertilip, joıylyp, qaıta túzetildi. Biraq, meniń oıymsha, Úkimettiń ózgerýimen birge atqarýshy bılik qaıta qurylady», — dep túıindedi sarapshy.
