Otstavkaǵa ketpek bolǵan Paragvaı prezıdentine ımpıchment jarııalandy
ASTANA. KAZINFORM — Paragvaı Senaty juma kúni prezıdent Santıago Penıanyń otstavkaǵa ketý týraly ótinishin qabyldamaı, oǵan ımpıchment jarııalady. Budan keıin 47 jastaǵy saıasatker úıqamaqqa alyndy, dep BBC jazdy.
Penıa daýys berý aıaqtalǵannan keıin birneshe mınýttan soń ustaldy. Ony qyzmetinen shettetýdi 45 senatordyń 44-i, sonyń ishinde prezıdenttik partııanyń ókilderi de qoldady. Sondaı-aq ımpıchment jarııalanýyna baılanysty ol burynǵy prezıdentterge beriletin ómir boıǵy senatorlyq mandatynan jáne burynǵy memleket basshylaryna beriletin zańdy artyqshylyqtardan aıyrylady.
Prezıdenttiń otstavkaǵa ketýi Ueno bankiniń kúıreýine baılanysty elde órshigen saıası jáne qarjylyq daǵdarys aıasynda oryn aldy. Daǵdarys apta basynda Ortalyq banktiń Ueno bankiniń qyzmetine aralasýynan bastaldy. Qarqyndy damyp kele jatqan tsıfrlyq banktiń qyzmetin Paragvaı halqynyń jartysyna jýyǵy paıdalanǵan. Reuters agenttiginiń habarlaýynsha, olardyń kóbi buǵan deıin bank qyzmetin paıdalanbaǵan.
Tólem qabiletine qatysty daǵdarysqa baılanysty bank shuǵyl túrde jabylyp, mıllıondaǵan klıent óz qarajatyna qol jetkize almaı qaldy, dep jazady CNN.
Reuters agenttiginiń habarlaýynsha, bılik ókilderi Ueno bankiniń nesıe berý saıasatyna jáne onyń eldiń saıası ári qarjylyq elıtasymen baılanysyna qatysty kúmán keltirgen. Penıanyń ózi byltyrǵa deıin osy bankke ıelik etetin holdıngtiń aktsıoneri bolǵan. Al Ortalyq bank tóraǵasy Karlos Karvalo 2023 jylǵa deıin Ueno bankiniń basshysy qyzmetin atqarǵan.
Osy aptada Karlos Karvalo otstavkaǵa ketti. Budan bólek, Ueno bankiniń segiz basshysyn qamaýǵa alý týraly sheshim shyǵaryldy. Al juma kúni prokýratýra Ortalyq banktiń burynǵy tóraǵasyn ustaýǵa da order berdi.
Prezıdent túsinikteme berý úshin Senatqa shaqyrylǵanymen, otyrysqa ózi kelmeı, ornyna advokattaryn jibergen. Olar tyńdaýdyń zańdylyǵyna kúmán keltirdi.
— Santıago Penıa otstavkaǵa ketý týraly ótinish bergendikten, ımpıchment rásiminiń nátıjeli aıaqtalýyna negiz joq, — dedi prezıdenttiń advokattarynyń biri Adolfo Ferreıro.
Soǵan qaramastan, Senat onyń otstavkaǵa ketý týraly ótinishin qabyldamaı, ımpıchment rásimin aıaqtady.
Penıa 2023 jyly 44 jasynda prezıdent laýazymyna kirisip, Paragvaı tarıhyndaǵy eń jas prezıdentterdiń biri atanǵan edi.
Buǵan deıin Paragvaı prezıdenti bank daǵdarysy men jappaı narazylyqtan keıin otstavkaǵa ketkenin habarlaǵan bolatynbyz.
