Otstavkaǵa ketken Úkimet qymbatshylyqty aýyzdyqtaı almady – Ermurat Bápı
ASTANA. KAZINFORM – Májilis depýtaty Ermurat Bápı otstavkaǵa jiberilgen Úkimet kúrdeli ekonomıkalyq mindetterdi atqara almady degen oıyn bildirdi.
«Úkimettiń otstavkaǵa ketýi keshegi kúnniń tarıhy, ony qaýzaı berýdiń qajeti joq. Ótken jyly men Álıhan Smaıylovtyń Úkimet basshysy bolýyna qarsy daýys bergem. Á.Smaıylov jaqsy jigit bolǵanymen, ol premerlik fýnktsııany atqarýǵa shamasy jetpedi. Otstavkaǵa ketken Úkimet qymbatshylyqty aýyzdaqtaı almady, kedeıshilikke qarsy úkimettik baǵdarlama jasaı almady. Ol Úkimet órt sóndirý qyzmetin atqardy, qaı jerde órt, qaıda apat — sonyń jaýabymen ǵana aınalysty. Eldiń kúrdeli ekonomıkalyq jaǵdaıynda otstavkaǵa ketken Úkimet ózine júktelgen mindetterdi atqara almady», - dedi Ermurat Bápı.
Odan bólek, depýtat jańa Úkimet basshysy retinde «Amanat» partııasy usynǵan Oljas Bektenovtiń kandıdatýrasyn qoldaıtynyn aıtty.
«Negizi meniń joramalymda Oljas Bektenovtiń kandıdatýrasy joq edi. Bul turǵyda men Prezıdenttiń kózqarasynan alshaqtaý bolǵan ekenmin. Qazir oılap otyrsam, ótpeli kezeńde atalǵan kandıdatýra qajet. Qazir eldiń bıýdjeti defıtsıt jaǵdaıda, onyń ústine qazynany ınvestıtsııa quıýmen toltyrý bolmaıtyn nárse, óıtkeni ol ústeme paıyzben qaıtarylatyn dúnıe. Meniń oıymsha, bıýdjetti toltyrýdyń ádisiniń biri el ishinde jáne shetel asqan aktıvterdi qaıtarý. Men oılaımyn, Oljas Bektenov Úkimet basyna kelse, Prezıdent aldymen zańsyz ketken aktıvterdi qaıtarýdy mindetteıdi. Árıne, O.Bektenov buǵan deıin ákim ne mınıstr bolmaǵan, biraq ol Prezıdent ákimshiligin basqaryp, bir jyldyń ishinde onyń kókke órleýi qustyń samǵaýyndaı boldy. Odan bólek, sybaılas jemqorlyqpen kúres agenttiginiń tóraǵasy boldy, demek zańsyz shetel asqan qarajat, sybaılas jemqorlyqpen kúres taqyryby oǵan tańsyq emes», - deıdi ol.
Onyń aıtýynsha, urlanǵan aktıvterdi qaıtaryp, el ekonomıkasyna jumsaý qajet.
«Árıne, jańa Premer-Mınıstrdiń kim bolatynyn tústen keıingi jıynda biletin bolamyz. Prezıdent te óz pikirin aıtatyn shyǵar», - dep qorytyndylady halyq qalaýlysy.
