Otstavkadaǵy sýdıalarǵa ómirboıǵy zeınetaqy taǵaıyndaý Eýropa hartııasyna saı keledi - B. Beknazarov
ASTANA. QazAqparat - Otstavkadaǵy sýdıalarǵa ómirboıǵy zeınetaqy taǵaıyndaý Eýropa hartııasyna saı keledi. Búgin Parlament Senatynyń jalpy otyrysynda depýtat Bektas Beknazarov osylaı málimdedi. Jalpy otyrysta «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrý engizý týraly» zańy qabyldanǵan bolatyn.
Senatordyń aıtýynsha, qujat Lıssabon qalasynda jasalǵan «Sýdıalardyń mártebesi týraly» halyqaralyq máni bar Eýropa hartııasyna sáıkes keledi. Ol hartııada otstavkadaǵy sýdıalardyń zeınetaqysy olardyń osy qyzmettegi sońǵy jalaqysy mólsherine meılinshe jaqyn bolýy kerektigi kózdelgen. Bul rette senator Bektas Beknazarov Qazaqstannyń sot júıesi 2011 jyldyń qyrkúıeginen bastap halyqaralyq sýdıalar qaýymdastyǵynyń tolyqqandy múshesi ekenin, sondyqtan elimizdegi sýdıalardyń zeınetaqylyq qamtylymy halyqaralyq standartqa saı bolýy kerektigine nazar aýdardy.
«Zań jobasy 15 jyldan astam ýaqyt boıy jaýapkershiligi joǵary, aýyrtpalyǵy zor qıyn da kúrdeli qyzmetti tek qana abyroımen atqarǵan sýdıalarǵa memleket tarapynan jasalǵan qamqorlyq bolyp tabylady. Ómirlik qamtylym zeınetkerlik jasqa tolǵan sýdıalardyń barlyǵyna birdeı tólenbeıdi, tek qurmetti otstavkaǵa shyqqan sýdıalarǵa ǵana tólenedi. Budan bólek, zań jobasy barlyq sýdıalardy kirshiksiz taza, adal da ádil qyzmet etkende ǵana usynylatyn ómir boıǵy qamtylymǵa yntalandyrý, osylaısha olardyń erteńgi kúnine, ıaǵnı zeınetkerlik jastaǵy jaǵdaıyna degen senimdiligin qalyptastyryp, adal eńbekke tartý bolyp tabylady», - dedi B. Beknazarov.
Tutastaı alǵanda otstavkaǵa shyqqan sýdıalardyń ómirlik qamtylymyna qatysty norma 2016 jyldyń qańtarynan bastap engiziledi. Bul qazirgi ýaqytta respýblıka boıynsha sany 508-ge jetken barlyq otstavkadaǵy sýdıalarǵa qoldanylady.
