Otshashýdan zardap shekkender óz quqyqtaryn qalaı qorǵaıdy
ALMATY. KAZINFORM — Pırotehnıkalyq zattardan jaraqat alǵan jaǵdaıda óz quqyǵyńyzdy qalaı qorǵaýǵa bolady. Bul týraly Kazinform agenttiginiń tilshisine zańger Nurlan Jańabaev aıtyp berdi.
«Zanger» Soltústik Qazaqstan zań keńesshileri palatasynyń zańgeri Nurlan Jańabaev pırotehnıkalyq buıymdardan japa shekken jaǵdaıda naqty áreketter algorıtmin ustanýǵa keńes berdi.
— Birinshi mindet — dárigerge kóriný kerek. Medıtsınalyq kómek sizdiń densaýlyǵyńyzdy saqtap qana qoımaıdy, sonymen qatar jaraqattyń alǵashqy dáleli bolady, — dep atap ótti zańger.
Taǵy bir mańyzdy qadam — barlyq dáleldi saqtaý. Quqyqtaryńyzdy qorǵaý úshin oqıǵanyń barlyq mán-jaılaryn jazyp alý qajet:
- Jaǵdaı bolǵan jerdi jáne alǵan jaraqattardy foto jáne vıdeoǵa túsirý;
- Pırotehnıkalyq zattardy qolma-qol aqshaǵa nemese onlaın satyp alǵanyńyzdy dáleldeıtin túbirtekterdi tastamaý;
Kýágerlerdiń sózin de jazyp alǵan abzal: olardyń aty-jóni men baılanys nómirleri sotta bolǵan jaǵdaıdy rastaýǵa kómektesedi.
— Esińizde bolsyn, neǵurlym dálel kóp bolsa, soǵurlym quqyǵyńyzdyń buzylǵanyn dáleldeýge jáne ótemaqy alý ońaı bolady, — dep túsindirdi Nurlan Jańabaev.
Sondaı-aq, faktini tirkeý úshin polıtsııaǵa habarlasý qajet. Olar tergeý júrgizip, hattama toltyryp, kinálilerdi anyqtaýǵa kómektesedi.
Eger otshashýdy satqan adam sizge ótemaqy usynbasa nemese ol jetkiliksiz bolsa, siz sotqa shaǵymdanýǵa quqylysyz.
Sotqa qalaı daıyndalý kerek
Nurlan Jańabaev eger adam pırotehnıkanyń kesirinen zardap shegip, sotqa shaǵym túsirgisi kelse, kelesi qujattar paketin usyný kerek:
Jaraqattyń sıpaty men dárejesin rastaıtyn medıtsınalyq anyqtamalar, rentgen jáne dárigerlerdiń shyǵarǵan qorytyndysy.
Jaraqattyń pırotehnıkalyq zattarmen baılanysty ekenin kórsetý mańyzdy.
Sýretter men vıdeolar. Oqıǵanyń sıpaty men mán-jaıyn anyq kórsetetin dáleldemeler.
Kýágerlerdiń túsiniktemesi sotta kúshti dálel bola alady.
Emdeý shyǵyndaryna qatysty qujattar. Medıtsınalyq qyzmetke, dári-dármekke jáne basqa da shyǵyndarǵa arnalǵan túbirtek zalaldyń kólemin dáleldeýge kómektesedi.
Aryz jaýapkerge qoıylatyn barlyq talabyn kórsete otyryp daıyndalýy kerek.
Jeke basyn kýálandyratyn qujattar.
— Sotqa aryz túsirmes buryn men mundaı isterge mamandanǵan zańgerge júginýdi usynamyn. Ol sizge sotta talap-aryz jazyp, qajetti qujattardy daıyndaýǵa kómektesedi, — dep keńes berdi Nurlan Jańabaev.
Zańger Qazaqstanda pırotehnıkalyq buıymdardy satý lıtsenzııalanǵan qyzmet túri ekenin eske saldy.
Nurlan Jańabaev pırotehnıkalyq zattardy satýǵa ruqsat lıtsenzııasy bar saýda oryndarynan alýǵa shaqyrdy. Bul onyń sapasy men qaýipsizdigine kepildik beredi.
Satyp alý aldynda pırotehnıkalyq zattardyń Qazaqstan standarttaryna sáıkestigin rastaıtyn taýar sertıfıkattaryn mindetti túrde teksergen durys.
Jazataıym jaǵdaılardy boldyrmaý úshin qoldanar aldynda nusqaýlardy muqııat oqyp shyqqan abzal.
— Pırotehnıkalyq zattardy zańsyz satqany úshin ákimshilik jaýapkershilik — 25 AEK (ıaǵnı 92 300 teńge) kóleminde aıyppul salý jáne taýardy tárkileý qarastyrylǵan, — dep eskertti zańger.
Pırotehnıkalyq zattar órttiń shyǵýyna sebep bolsa, adamnyń densaýlyǵyna aýyr zııan keltirse nemese kisi ólimine ákep soqtyrsa, kináli adam qylmystyq jaýapqa tartylady.
Buǵan deıin mereke kezindegi qaýipsizdik sharalary aıtyldy.