Jeńildetilgen deklaratsııa: Komıtet arnaýly salyq rejıminiń artyqshylyǵyn atady
ASTANA. KAZINFORM — 2026 jylǵy 1 naýryzda salyq tóleýshiler qoldanylatyn salyq salý rejımin tańdaýdyń ótpeli kezeńi aıaqtaldy, dep habarlaıdy Memlekettik kirister komıtetiniń baspasóz qyzmeti.
Ótpeli kezeńniń qorytyndysy boıynsha bıznes sýbektileriniń kópshiligi qyzmetin júrgizýdiń jeńildetilgen sharttaryna baǵyttalǵan arnaýly salyq rejımderin saqtap qaldy nemese tańdady.
1,2 mıllıonnan astam kásipker jeńildetilgen deklaratsııamen arnaýly salyq rejımin tańdady. Jeńildetilgen deklaratsııa shaǵyn jáne orta bıznes arasynda eń tanymal rejım bolyp qala beredi, sebebi ol olar úshin saqtaldy jáne jańartyldy.
Bul rejım jyldyq kirisi 600 000 AEK-ke deıingi (shamamen 2,6 mıllıard teńge) salyq tóleýshilerge qoljetimdi.
Rejımniń artyqshylyqtary:
- Jaldamaly jumyskerler sanyna shekteýler joq, bul eńbek qatynastaryn zańdastyrýǵa yqpal etedi;
- biryńǵaı KTS/JTS mólsherlemesi 4%, bul rette maslıhattarǵa mólsherlemeni 50%-ǵa deıin tómendetý nemese joǵarylatý quqyǵy berilgen;
- Qosylǵan qun salyǵynan bosatý.
- Deklaratsııalardy jyl saıyn eki ret tapsyrý jáne salyqty tóleý.
— Bul sharttar bıznesti júrgizýdi qarapaıym, ashyq jáne boljamdy etedi. Ózin ózi jumyspen qamtyǵandar úshin arnaýly salyq rejımin 346 myń jeke adam, onyń 265 myń jańadan tirkelgender qoldanady. Osylaısha, salyq reformasy 265 myń jeke adamdy «kóleńkeli» ekonomıkadan shyǵaryp, resmı túrde jumys isteýge múmkindik berdi, — delingen habarlamada.
Bul rejım platformalyq servıs arqyly jumysty qosa alǵanda, aıyna 300 AEK-ke deıingi (shamamen 1,3 mıllıon teńge) tómen tabysy bar azamattarǵa, sondaı-aq jaldamaly qyzmetkersiz, epızodtyq qyzmetti júzege asyratyn tulǵalarǵa arnalǵan.
Ózin-ózi jumyspen qamtyǵandarǵa arnalǵan rejımdi QR azamattary jáne buryn patent negizinde nemese arnaýly mobıldi qosymsha arqyly ASR-di paıdalanǵan, dara kásipker retinde tirkelmegen, jaldamaly qyzmetkerlerdi jumysqa almaıtyn jáne ruqsat etilgen qyzmet túrlerimen (40 qyzmet túri) aınalysatyn qandastar qoldanýǵa quqyly.
Rejımniń negizgi artyqshylyqtary — ózin-ózi jumyspen qamtyǵandar úshin mindettemelerdi oryndaý barynsha ońaılatyldy:
- Dara kásipker retinde tirkelý talap etilmeıdi;
- Jeke tabys salyǵynan bosatylady;
- Bir ǵana mindetteme –zeınetaqy, áleýmettik jáne medıtsınalyq jarnalardy qosa alǵanda, kiristen 4% mólsherinde áleýmettik tólemderdi tóleý.
Ózin-ózi jumyspen qamtyǵandarǵa arnalǵan rejım azamattarǵa resmı túrde jumys isteýge, zeınetaqy jınaqtaryn qalyptastyrýǵa jáne áleýmettik qorǵaý alýǵa múmkindik beredi.
Buǵan deıin Serik Jumanǵarın bıyl bızneske qysym jasamastan 4 trln teńge salyq túsirý kerek ekenin aıtty.
