«Otpan» kesheninde qazaqtyń úsh bıine eskertkish ornatyldy
ASTANA. QazAqparat - «Otpan» tarıhı mádenı kesheninde qazaqtyń úsh bıine eskertkish ornatyldy. Bul týraly búgin Ortalyq kommýnıkatsııalar qyzmetindegi baspasóz máslıhatynda Mańǵystaý oblysynyń ákimi Eraly Toǵjanov aıtty, dep habarlaıdy QazAqparat.
«Elbasynyń Jarlyǵymen bekitilgen «Alǵys kúnine» oraı oblys boıynsha 1 naýryzdan bastap «Asar - Jomart júrek» qaıyrymdylyq aktsııasynyń 2 kezeńi ótti. Nátıjesinde, 55 mln teńge jınalyp, 6,5 myńǵa jýyq otbasyǵa kómek kórsetildi. Olardyń qatarynda aýyr syrqatqa shaldyqqan sábıler, balalar úıiniń tárbıelenýshileri, qarttar úıindegi qarııalar, áleýmettik jaǵdaıy tómen otbasylar, jalǵyz basty analar men qamqorshysynan aıyrylǵan balalar bar», - dedi oblys basshysy.
Sonymen qatar ol bıyl alǵash ret óńirde «Otpan taý-rýhanı dástúrimizdiń negizi» atty Amal merekesi respýblıkalyq deńgeıde toılanǵanyn atap ótti. Sharaǵa elimizdiń 9 oblysyndaǵy tarıhı-mádenı keshenderiniń shyraqshylarynyń qatysýymen «birlik» oty jaǵyldy. Máńgilik el ıdeıasyn nasıhattaıtyn ǵylymı, mádenı kópshilik, sporttyq, áleýmettik deńgeıdegi sharalarǵa barlyq aımaqtan arnaıy qonaqtar shaqyrylyp, tamashalady.
«Kelesi jyly halyqaralyq dárejede ótkizýge daıyndyqty qazirden bastaımyz. «Otpan» tarıhı mádenı keshenine qazaqtyń úsh bıine eskertkish ornattyq. Qazaq bılerine birinshi ret dalada eskertkish ornatyldy. Bul bılerimiz birliktiń, eldiktiń sımvoly bolǵandyǵyn da ózderińiz jaqsy bilesizder», - dedi Eraly Toǵjanov.
