Ótkir tynys joldary vırýstyq ınfektsııalardyń taralýy bıyl ótken jyldarmen salystyrǵanda tómen bolady
ALMATY. Qazannyń 19-y. QazAqparat /Erlik Erjanuly/ - Qazaqstanda jyl saıyn ótkir tynys joldary vırýstyq ınfektsııalardyń 1,5 mıllıonǵa jýyq oqıǵasy tirkeledi. Bul búgin Almatyda "Qazaqstandaǵy tumaý jáne ótkir tynys joldary vırýstyq ınfektsııalarǵa shaldyǵýshylyq boıynsha boljam. Aldyn alý sharalary" dep atalatyn baspasóz máslıhatynda aıtyldy.
"Tumaý men ótkir tynys joldary vırýstyq ınfektsııalardyń sharyqtaý shyńy - kúzgi-qysqy merzimge keletin maýsymdyq aýrýlardyń ósýine ákeledi. Onymen aýyratyn adamdardyń qatarynda 14 jasqa deıingi balalar 69 - 72 paıyz aralyǵynda boldy. Bıyl da buǵan deıingi maýsymdarmen salystyrǵanda tumaý men ótkir tynys joldary vırýstyq ınfektsııalarda qandaı da bir ózgeshelik bolmaıdy", - deıdi QR Densaýlyq saqtaý mınıstrligi Sanıtarlyq-epıdemıologııalyq saraptaý jáne monıtorıngteý ǵylymı-tájirıbelik ortalyǵynyń Epıdemıologııalyq monıtorıng jáne táýekeldi baǵalaý bóliminiń meńgerýshisi Aınagúl Qýatbaeva. Ortalyq mamandarynyń boljamyna qaraǵanda, aýrýdyń ósý kezeńi jeltoqsannyń ortasynda bastalyp, onyń sharyqtaý shyńy qańtardyń 3, 4 aptasyna, ıaǵnı 15-20-sy kúnderi oryn almaq.
Al aqpan-naýryz aıynda buǵan deıingi jyldardaǵydaı B vırýsynyń belsendiligi joǵary bolady. Naýryzdyń ortasynda aýrýdyń taralýy birshama joǵarylaýy, nemese ekinshi tolqyn bolýy múmkin. Degenmen, aýrýdyń ekinshi tolqyny birinshimen salystyrǵanda 10 esege deıin tómen bolady.
