Ótkenimizdi tanymaı, jańǵyrý iske aspaıdy - Sýmro Manzýr Hýseın
ASTANA. QazAqparat - Ekonomıkalyq yntymaqtastyq uıymy Ǵylym qorynyń prezıdenti Sýmro Manzýr Hýseın Astanada Halyqaralyq Túrki akademııasy (TWESCO) uıymdastyrýymen ótken «Uly dala» ІІ gýmanıtarlyq ǵylymdar forýmynda túrki órkenıetiniń jańǵyrýy mádenı, tarıhı aspektisiz oryn alýy múmkin emes ekendigin jetkizdi, dep habarlaıdy QazAqparat.
Onyń sózinshe, «Uly dala» forýmy túrki dúnıesiniń, túrki halyqtarynyń mádenı, rýhanı jaqyndasýyna yqpal etedi.
«Bul forým túrki halyqtarynyń yqpaldastyǵyn nyǵaıtyp, tarıhı jáne mádenı aspektiler boıynsha naqty usynystardy birlese otyryp jasaqtaýǵa múmkindik beretin úlken platforma. Osyndaı jıyndar ǵalymdarymyzdyń áriptestik ornatýyna, birge otyryp, qazirgi zamanda oryn alyp jatqan oqıǵalardy talqylaýǵa jol ashady», - dep atap kórsetti ol óz baıandamasynda.
Sonymen qatar, Sýmro Manzýr Hýseın myrza QR Prezıdenti Nursultan Nazarbaevtyń Qazaqstan qoǵamyn, ekonomıkasyn, mádenıetin jańǵyrtý bastamasy barsha túrki jurtyna da úlgi bola alatynyn atap ótti.
«Joǵary mártebeli Nursultan Nazarbaev myrza, Qazaqstan Respýblıkasynyń Prezıdenti mádenı mura men qundylyqtarǵa negizdelgen bolashaqty qurýǵa kúsh-qýatyn salyp kele jatqandyǵyn atap ótkim keledi. Onyń «Bolashaqqa baǵdar: Rýhanı jańǵyrý» atty baǵdarlamasynda ulttyń negizgi, fýndamentaldy damýy saıası jáne ekonomıkalyq jańǵyrýǵa basymdyq berýi qajet degen sózi óte durys baǵyt. Jańǵyrý protsesi mádenıet pen ulttyq birtektiliktiń damýynsyz júre almaıdy. Men Prezıdenttiń sózderin tolyq quptaımyn da, qoldaımyn da. Ótkenimizdi, órkenıetimizdi tanymaı, jańǵyrý bos sóz bolyp qalady. Jańǵyrý týraly sóz qozǵaǵanda osyny kóńilge qondyrýymyz kerek. Jahandaný zamanynda biz ótken tarıhymyzdy tanymaı, álemnen shettetilip, búrkenshik jaýyp jata almaımyz. Sondyqtan árqaısymyz jahandyq álemde básekege qabiletti bolýymyz úshin barlyq órkenıetter birlese, ortaqtasa damýy qajet», - dedi qor basshysy.
Osy tusta, onyń pikirinshe, atalmysh maqsatqa qol jetkizý jolynda BUU Qaýipsizdik Keńesiniń Turaqty emes músheligine qabyldanýy úlken qolǵabys bolmaq.
«Sonymen Qazaqstan eli BUU Qaýipsizdik Keńesiniń turaqty emes múshesi bolyp taǵaıyndalýymen quttyqtaımyn. Bul oqıǵa bizdiń aımaq úshin asa mańyzdy. Sol sebepti bizder - ǵalymdar BUU-nyń 2030 jylǵa arnalǵan jahandyq damý mindetterimen jiti tanysyp shyǵýymyz kerek. Onyń ishinde aımaqtyq damý áleýetin damytý máselelerine kóńil aýdarý shart», - dep túıdi oıyn Sýmro Manzýr Hýseın.
Aıta keteıik, búgin, 26 mamyrda Astanada Halyqaralyq Túrki akademııasy (TWESCO) uıymdastyrǵan «Uly dala» ІІ gýmanıtarlyq ǵylymdar forýmy óz jumysyn bastady. Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyna arnalǵan forýmnyń ashylý saltanatyna Qazaqstan Respýblıkasynyń Memlekettik hatshysy Gúlshara Ábdiqalyqova men BUU, ıÝNESKO, ISESKO, ECO Science Foundation, Túrki keńesi, TÚRKSOI, TúrkPA syndy halyqaralyq uıym basshylary men ókilderi qatysty.
AQSh, Vengrııa, Germanııa, Qytaı, Mońǵolııa, Ońtústik Koreıa, Úndistan, Reseı men túrki memleketterinen kelgen 200-ge jýyq ǵalym-zertteýshiler men sarapshylar 6 paneldi otyrysta mazmundy baıandamalar jasap, Elbasy maqalasynda kóterilgen mindetter men taqyryptar tóńireginde paıymdy pikirlerin ortaǵa saldy.
