«Ótkenge - qurmet, bolashaqqa - senim» - respýblıkalyq basylymdarǵa sholý
ASTANA. Mamyrdyń 1-i. /QazAqparat/ - Qazaq aqparat agenttigi respýblıkalyq basylymdarda mamyrdyń 1-i, senbi kúni shyqqan ózekti materıaldarǵa sholýdy usynady.
«Memleket basshysy Nursultan Nazarbaev Qazaqstan Respýblıkasynyń Tabıǵı monopolııalardy retteý agenttiginiń tóraǵasy Nurlan Aldabergenovti qabyldady», dep jazady «Egemen Qazaqstan» gazeti QR Prezıdentiniń baspasóz qyzmetine silteme jasap. N.Aldabergenov Prezıdentti elektr stansylary men óńirlik elektr jelilik kompanııalarǵa olardyń óndiristi jańǵyrtý týraly ınvestıtsııalyq mindettemelerin oryndaýlary boıynsha júrgizilgen tekseristiń qorytyndylary týraly habardar etti. Áńgimelesý barysynda sondaı-aq, energııamen qamtý máselesi talqylandy. Sondaı-aq sol kúni Elbasy «Syrbar» syrtqy barlaý qyzmetiniń dırektory Amanjol Janqulıevti de qabyldady. A.Janqulıev vedomstvonyń odan ári qalyptasýyna baǵyttalǵan uıymdastyrý máseleleriniń sheshimi týraly baıandady. Kezdesý barysynda Uly Otan soǵysyndaǵy Jeńistiń 65 jyldyǵyn merekeleýdiń aıasynda syrtqy barlaý ardagerlerine qurmet kórsetýdi uıymdastyrý is-sharalary týraly áńgime boldy.
Keshe Parlament Senatynyń Tóraǵasy Qasym-Jomart Toqaev Grýzııanyń Qazaqstandaǵy Tótenshe jáne Ókiletti Elshisi Paata Kalandadzeni onyń ótinishi boıynsha qabyldady. Bul týrasynda «Egemen Qazaqstan» gazeti atalǵan palatanyń baspasóz qyzmetine silteme jasap habarlap otyr. «Kezdesý barysynda Qazaqstan men Grýzııa arasyndaǵy yntymaqtastyqty odan ári nyǵaıtý máseleleri talqylandy. P.Kalandadze Qazaqstan-Grýzııa qatynastary, «tutastaı alǵanda úılesimdi jáne qarqyndy» ekenin aıta kelip, parlamentaralyq únqatysýdy belsendilendirý týraly oılarymen bólisti. Q.Toqaev ózara ekijaqty is-qımyldy nyǵaıtýǵa Qazaqstannyń múddeliligin atap ótip, parlamentaralyq baılanystardy damytýdyń mańyzdylyǵyna toqtaldy», dep jazady basylym.
«Ótkenge - qurmet, bolashaqqa - senim». «Egemen Qazaqstan» gazetiniń senbilik nómirinde osy taqyryppen jaryq kórgen maqalaǵa keshe Aqordada Memlekettik hatshy - Syrtqy ister mınıstri Qanat Saýdabaevtyń tóraǵalyǵymen QR Prezıdentiniń janyndaǵy Memlekettik nagradalar jónindegi komıssııanyń kezekti májilisi arqaý bolǵan. Uly Jeńistiń 65 jyldyǵy qarsańynda ótip otyrǵan alqaly jıyndy ashqan Q.Saýdabaev óz sózinde «Búgingi kúnderi adamzat tarıhyndaǵy eń qantógisti soǵystyń uly batyrlarynyń bizdiń aramyzdaǵy sany azaıyp barady, Uly Otan soǵysy ardagerlerine qamqorlyq pen shynaıy qurmet kórsetý - biz úshin qasıetti paryz», dep atap ótken.
Uly Otan soǵysy shynymen de kópetnosty Qazaqstan halqynyń árbir otbasynda derlik óziniń qaıǵyly izin qaldyrǵany belgili. Maıdanǵa elimizden 1,2 mıllıon qazaqstandyq qoldaryna qarý alyp soǵysqa attansa, sonyń teń jarymy urys dalalarynda qaza tapty. Búgingi tańda elimizde 14 400 Uly Otan soǵysy ardageri men 258 myń tyl eńbekkeri bar eken. Eger ótkenimizdi rızashylyqpen este saqtamasaq, onda jarqyn bolashaqtyń bolýy da múmkin emes.
***
«Qazaqstannyń Densaýlyq saqtaý mınıstrligi aýyldy jerlerge jedel medıtsınalyq kómek kórsetý maqsatynda tikushaqtar satyp alýdy josparlap otyr», dep jazady «Lıter» gazeti. Bul aqparatty BAQ ókilderine atalǵan mınıstrliktiń Medıtsınalyq jáne farmatsevtıkalyq qyzmetterdi baqylaý komıtetiniń sarapshysy Maksım Kasatkın jetkizgen.
Jazylǵan jaıttyń tolyq nusqasyn basylymnyń senbilik nómirinen oqı alasyzdar.
***
Qazaqstan naryǵynda áıel kásipkerler erkekterdi yǵystyryp otyr. Belsendi áıel qaýymy respýblıkanyń shaǵyn jáne orta bıznesiniń jartysynan astamyn jaýlap alǵan. Bul jaıynda «Ekspress-K» gazeti Eńbek jáne halyqty áleýmettik qorǵaý mınıstrliginde ótken «Bıznestiń jol kartasy - 2020: genderlik aspektiler» atty dóńgelek ústel barysynda belgili bolǵan derekter negizinde jazyp otyr. Máselen, «Ulttyq medıtsınalyq holdıng» AQ Basqarmasy tóraǵasynyń orynbasary Beksultan Tutqyshevtiń aıtýynsha, shaǵyn jáne orta bıznestegi áıelder úlesi qazirdiń ózinde 52 paıyzǵa jetse, jeke kásipkerliktegi olardyń úlesi 66 paıyzdy quraǵan.
***
«Búgin búkil el Qazaqstan halqynyń birligi kúni merekesin atap ótedi», dep jazady «Kazahstanskaıa pravda» gazeti. Basylymda «Bir el - bir taǵdyr» degen taqyryppen jarııalanǵan maqalada bul mereke kópultty respýblıkada turatyn árqaısymyz úshin erekshe qymbat ekendigi basa aıtylǵan.
Sonymen qatar basylym mereke qarsańynda Ult birligi doktrınasynyń jańa jobasynyń tusaýkeseri ótkendigin de jazǵan.
«Kazahstanskaıa pravda» gazetiniń senbilik nómirinen merekege oraı budan da basqa qyzyqty maqalalar oqı alasyzdar.
