Ótken jyly jol-kólik oqıǵalary saldarynan 3 myńnan astam adam qaza boldy
ASTANA. 12 aqpan. QazAqparat - 2012 jyly jol-kólik oqıǵalary saldarynan 3 myńnan astam adam qaza boldy. Bul týraly búgin Parlament Májilisinde «Jol júrisi týraly» zań jobasyn talqylaý barysynda Іshki ister mınıstriniń orynbasary Erlik Kenenbaev málim etti.
Mınıstr orynbasarynyń aıtýynsha, jol polıtsııasy tarapynan qabyldanyp jatqan sharalarǵa qaramastan elimizdiń joldarynda apattylyq jaǵdaı kúrdeli kúıinde qalýda. «Shyndyǵynda 2012 jyly elimizde 14 myńnan astam jol-kólik oqıǵasy tirkelgen. Ondaı oqıǵalardyń saldarynan 3 myńnan asa adam qaıtys bolyp, 17 500-ge tarta azamat túrli dárejede dene jaraqattaryn aldy», - dedi Erlik Kenenbaev. Onyń aıtýynsha, 2012 jyly 2011 jylmen salystyrǵanda jol-kólik apaty 18 paıyzǵa deıin artqan. Al ondaı oqıǵalardyń saldarynan qaıtys bolǵandar sany 11,6 paıyzǵa ósse, jaraqattanǵandardyń sany tıisinshe 24,9 paıyzǵa artyp otyr.
«Osy tirkelgen 14 myńnan astam jol-kólik oqıǵalarynyń 400-ge jýyǵy kólikti mas kúıinde júrgizýden týyndap otyr», - deıdi E. Kenenbaev.
