Ótken jyly jalǵan bankrottyq jasaǵan 132 boryshkerge qatysty qylmystyq is qozǵaldy
ASTANA. QazAqparat - Ótken jyly jalǵan bankrottyq jasaǵan 132 boryshkerge qatysty qylmystyq is qozǵaldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Qarjy mınıstrligi Salyq komıteti tóraǵasynyń orynbasary Nurıla Úsenova málim etti.
Onyń atap ótýinshe, ótken jyly ǵana qarjy polıtsııasy organdarymen birlesken jumystyń nátıjesinde aımaqtyq bólimsheler men konkýrstyq basqarýshylardyń aryzdary negizinde 132 boryshkerge qatysty ádeıi jáne jalǵan bankrottyq, salyq tóleýden bas tartý, jalǵan bankrottyq faktileri boıynsha qylmystyq is qozǵaldy. 73 boryshkerdiń jetekshileri ústinen 3,3 mlrd. teńge quraıtyn materıaldyq zalaldardy óndirý boıynsha sot sheshimi shyǵaryldy.
«2 konkýrstyq basqarýshy ústinen qarjy polıtsııasy organdary men alaıaqtyq, kommertsııalyq satyp alý, para berý faktileri boıynsha qylmystyq ister qozǵaldy», - dedi ol.
N.Úsenovanyń sózine qaraǵanda, ótken jyly taratylý ústindegi 110 bankrottan 2,9 mlrd. teńge kólemindegi jalaqy bereshegi óndirildi. Bul jalpy jalaqy beresheginiń 80 paıyzyn quraıdy.
