Ótken jyly turmystyq zorlyq-zombylyq jasaǵany úshin 35 myń adam ákimshilik jaýapkershilikke tartyldy - depýtat J.Asanov
ASTANA. 25 qańtar. QazAqparat /Gúlmıra Álıakparova/ - Ótken jyly turmystyq zorlyq-zombylyq jasaǵany úshin 35 myń adam ákimshilik jaýapkershilikke tartyldy. Bul týraly búgin Astanada ótken respýblıkalyq konsýltatıvtik keńeste Májilis depýtaty Jaqyp Asanov aıtty.
J.Asanovtyń aıtýynsha, taıaý ýaqytqa deıin turmystyq zorlyq-zombylyq áleýmettik problema retinde qaralyp kelgen joq. Onymen bir mezgilde, Іshki ister mınıstrligi jyl saıyn osyndaı myńdaǵan faktini tirkep otyrdy. Qoldanystaǵy zańnama turmystyq zorlyq-zombylyqtardyń shuǵyl túrde aldyn alýǵa jáne qaýipsizdik qamtamasyz etýge múmkindik bergen joq. Memleket, agressor pıǵylyn júzege asyrǵannan keıin ǵana aralasýǵa quqyly boldy.
Al 2009 jyldyń 4 jeltoqsanynda «Turmystyq zorlyq-zombylyqtyń profılaktıkasy týraly» QR Zańy qabyldanǵannan keıin, memlekettik jáne memlekettik emes organdar belgili bir ýákilettikterge ıe boldy. Biraq depýtat atap ótkendeı, atalmysh Zań áli de tolyqtyrýlar men ózgertýlerdi qajet etedi.
Degenmen nátıjeler búginnen kórine bastady. «Ótken jyly turmystyq zorlyq-zombylyq jasaǵany úshin ákimshilik jaýapkershilikke tartylǵan tulǵalardyń sany 70 paıyzǵa kóbeıip, 35 myń adamdy qurady. Bul óte úlken san. Birinshiden bul, zardap shegýshilerdiń belsene túskenin jáne polıtsııa organdarynyń osy baǵyttaǵy qyzmeti jetildirile túskenin kórsetip otyr. Jańa Zańǵa sáıkes polıtsııa organdarymen qorǵaý týraly 15 myń uıǵarym berildi. Sottar 600-ge jýyq buzýshynyń tártibine qatysty qatań talaptar qoıdy», - dedi ol.
Depýtat atap kórsetkendeı, jazalardyń 96 paıyzy er azamattarǵa, 4 paıyzy kámeletke tolmaǵandar men áıelderge qoldanyldy. Sondaı-aq onyń aıtýynsha, respýblıkada jyl saıyn 500-ge jýyq áıel turmystyq zorlyq-zombylyq saldarynan kóz jumady. «Statıstıka ókinishke qaraı, azaımaı otyr», - dedi ol.
