Ótken jyly sheteldikterdiń qatysýmen 46 iri ınvestıtsııalyq joba iske qosylǵan
ASTANA. QazAqparat - QR Premer-Mınıstri Álıhan Smaıylovtyń tóraǵalyǵymen ótken Sheteldik ınvestorlar keńesiniń aralyq otyrysynda Keńestiń Qazaqstandaǵy ónerkásip pen kólik salasyn tsıfrlyq transformatsııalaý máselelerine arnalǵan 35-plenarlyq otyrysyna daıyndyq barysy, sondaı-aq jumys toptarynyń esepteri qaraldy, dep habarlaıdy QazAqparat.
Premer-Mınıstr óz sózinde qazirgi ýaqytta Úkimet retteýshilik saıasatty jeńildetý jáne ekonomıkanyń naqty sektorynyń ınvestıtsııalyq tartymdylyǵyn arttyrý boıynsha belsendi jumys istep jatqanyn atap ótti. Jańa Salyq jáne Bıýdjet kodeksteri ázirlenip jatyr, memlekettiń ekonomıkaǵa qatysý úlesin odan ári azaıtý, demonopolızatsııalaý jáne kóleńkeli aınalymǵa qarsy kúres boıynsha sharalar qabyldanýda.
Úkimet basshysynyń aıtýynsha, bul jalpy respýblıkanyń ınvestıtsııalyq ahýalyna oń áser etedi, ony naqty sandar rastap otyr:
- 2022 jylǵy 9 aıdyń qorytyndysy boıynsha tikeleı sheteldik ınvestıtsııalardyń jalpy kólemi 18%-ǵa ósip, $22 mlrd-tan asty;
- jalpy ótken jyly sheteldikterdiń qatysýmen 46 iri ınvestıtsııalyq joba iske qosyldy.
Sonymen qatar Premer-Mınıstr Qazaqstan damýdyń jańa kezeńine aıaq basa otyryp, tsıfrlyq transformatsııalaýdy qajet etetinin, oǵan ýákiletti memlekettik organdar tarapynan erekshe nazar aýdarylatynyn aıtty.
