Ótken jyly sheneýnikter 245 syılyqty memleketke tapsyrǵan

NUR-SULTAN. QazAqparat - Ótken jyly Memlekettik múlik jáne jekeshelendirý departamentterine 245 syılyq tapsyryldy. Onyń 18-i 159 937 teńgege satyldy, dep habarlaıdy QazAqparat Qarjy mınıstrligine silteme jasap.

Memlekettik zańdy tulǵalardyń teńgeriminde baǵalaý quny 967 971 teńgeni quraıtyn 30 birlik bekitilgen, 12 birlik joıyldy.

2020 jyly tirkelgen eń qymbat syılyq - Iphone 12 Pro uıaly telefony (2020 jyldyń jeltoqsanynda esepke alyndy). Ol 617 991 teńgege baǵalandy.

Eń tómengi baǵalaý quny - 800 teńge - aq tústi plastıkalyq gúlder jáne «Dream» markaly shokolad.

Syılyqtardy satý kezinde: «Tom Ford» Lost cherry EAU Parfum ıis sýy aýktsıon arqyly 59 467 teńgege (baǵalaý quny 118 934 teńge), ıaǵnı eń joǵary somaǵa satyldy, eń kishisi - «Dream» aq gúlder men shokolad úshin 205 teńge (baǵalaý quny 800 teńge).

Eske sala keteıik, jaýapty memlekettik qyzmetti atqaratyn adamdar óziniń qyzmettik jaǵdaıyna nemese qyzmettik mindetterin oryndaýyna baılanysty resmı is-shara barysynda berilgen syılyqtardy alǵan (tabylǵan) kúnnen bastap 7 kúntizbelik kún ishinde tapsyrýǵa mindetti.

Ony QR QM Memlekettik múlik jáne jekeshelendirý komıtetiniń aýmaqtyq bólimshelerine tapsyrady.