Ótken jyly sapasyz qyzmet atqarǵan 40 sýdıa laýazymynan bosatyldy - M.Álimbekov
ASTANA. 14 qańtar. QazAqparat /Marlan Jıembaı/ - Ótken jyly sapasyz qyzmet atqarǵan 40 sýdıa laýazymynan bosatyldy.
Bul týraly búgin QR Joǵarǵy sotynyń aqparattyq-tehnıkalyq ortalyǵynyń ashylýy barysynda BAQ ókilderine suhbat bergen Joǵarǵy sottyń tóraǵasy Musabek Álimbekov aıtty.
Sot salasynda da biren-saran aǵattyqtar kezdesip jatatyndyǵyn ashyq aıtqan Joǵarǵy sot tóraǵasynyń atap ótýinshe, sońǵy kezderi sýdıalardyń qyzmetin durys atqarýyn qadaǵalaý baǵytynda birqatar is-sharalar atqarylǵan.
Qyzmet barysynda birneshe márte qatelikterge boı aldyrǵan sýdıalarǵa sot monıtorıngin jasap jatqandyqtaryn atap ótken M.Álimbekov: «Biz sol arqyly onyń barlyq atqarǵan jumysyn zertteımiz. Ol tek sýdıanyń qaraǵan isine ǵana qatysty emes. Jalpy oǵan qoǵamdyq kózqaras qandaı degen máseleni de nazarda ustaımyz. Qoǵamdyq pikirdi saralap, ýnıversıtet stýdentterin tarta otyryp sotqa qatysqan adamdardy aralaý arqyly pikirlerin surastyryp jatyrmyz», - dedi.
Sonymen qatar qyzmettik laýazymyna sáıkes kelmegen sýdıa jumystan bosatylatyndyǵyn basa aıtqan ol: «Ótken jyly óz erkimen, basqa da jaǵdaılarmen jumystan bosaǵan adamdar bar. Biraq jumysynyń sapasy nashar boldy degen sebeppen 2010 jyly 40 sýdıany jumysynan bosattyq. Olardyń birazy tártiptik jaýapkershilik arqyly, taǵy birazy sot sheshimimen qyzmetinen ketti», - dedi.
