Ótken jyly prokýrorlar zańsyz ustalǵan 766 azamatty bosatqan

ASTANA. QazAqparat - Bas prokýratýra 2018 jyldyń jumysyn qorytyndylap, negizgi mindetterdi aıqyndady, dep habarlaıdy QazAqparat tilshisi quzyrly vedomstvonyń baspasóz qyzmetine silteme jasap.

Bas prokýratýradaǵy keńeıtilgen otyrysta Qazaqstan Respýblıkasynyń Bas prokýrory Qaırat Qojamjarov qadaǵalaý organynyń qyzmeti Memleket basshysynyń qylmystyq-quqyqtyq salany izgilendirý jáne jańǵyrtý, elimizdegi qoǵamdyq-saıası turaqtylyqty qamtamasyz etý, quqyq qorǵaý qyzmetin tsıfrlandyrý jónindegi tapsyrmalaryn oryndaýǵa baǵyttalǵanyn atap ótti. Onyń aıtýynsha, Qazaqstan táýelsizdiginen bergi kórsetkishti esepke alǵanda 2018 jyly alǵash ret qylmystyq protsestiń eń tómengi repressıvtik deńgeıi tirkelgen.

«Ustalǵandar men qamaýǵa alynǵandar 4 esege (tıisinshe 43 myńnan 10 myńǵa jáne 38 myńnan 9 myńǵa), bas bostandyǵynan aıyrýǵa sottalǵandar 5,5 esege (40 myńnan 7 myńǵa) azaıdy. Jańa reformalar krımınogendik ahýaldy nasharlatqan joq. Qylmysty tómendetý úrdisi saqtalyp otyr. Qylmystyń aýyr jáne asa aýyr túrleri 19 paıyzǵa (26 myńnan 21 myńǵa) azaıdy», - deıdi Qaırat Qojamjarov.

Sonymen birge, Bas prokýror quqyq qorǵaý organdary jumysynyń qylmystyq protseske qatysýshylardyń quqyqtaryn buzýǵa qatysty jekelegen kemshilikterine nazar aýdardy.

«2018 jyly prokýrorlar zańsyz ustalǵan 766 azamatty bosatty. Bul 2017 jylǵy kórsetkishten 3,5 ese kóp. Tergeý organdarynyń kemshiliginen 400-ge jýyq qylmysker jaýapkershilikten jaltarǵan. Tergeýdiń ruqsat etilmegen ádisteri, kinásiz adamdy qasaqana jaýapqa tartý, azaptaý jáne bılikti asyra paıdalaný faktileri boıynsha 348 qylmystyq is tergeldi», - deıdi ol.

Qylmystyq qýdalaý organdarynyń kemshilikterin atap ótken Qaırat Qojamjarov prokýrorlardan zańdylyqty qamtamasyz etýdi talap etti.