Ótken jyly óndiristik jaraqattan 180 adam qaza tapty - mınıstrlik
«2019 jyldyń qorytyndysy boıynsha respýblıka kásiporyndarynda 1 257 jazataıym oqıǵa boldy, sonyń saldarynan 1 430 adam zardap shekti. Bul 2018 jylǵy kórsetkishten 8,8 paıyzǵaǵa tómen (2018 jyly – 1 568 adam), onyń ishinde 180 adam qaza tapqan, bul 2018 jylǵa qaraǵanda 17,6 paıyzǵa tómen (2018 jyly - 220 adam)», - delingen Eńbek jáne halyqty áleýmettik qorǵaý mınıstrligi málimetinde.
Ekonomıka salalary bólinisinde zardap shekkenderdiń eń kóp sany taý-ken metallýrgııa kesheni kásiporyndarynda – 244 nemese 17,1 paıyz jáne qurylys salasynda – 176 nemese 12,3 paıyz qurady.
«Óndiristik jaraqattanýdyń joǵary deńgeıi Shyǵys Qazaqstan (zardap shekkender 212 adam), Qaraǵandy (189 adam), Pavlodar (117 adam), Qostanaı (114 adam) oblystarynda jáne Almaty qalasynda (111 adam) saqtalýda», - dep atalyp ótken habarlamada.
Eńbekti qorǵaý salasynda eń jıi jol beriletin buzýshylyqtar: qaýipsiz eńbek jaǵdaılaryn qamtamasyz etpeý – 14,9 paıyz (353); qyzmetkerlerge oqytý men nusqama júrgizbeý – 14,3 paıyz (340); jeke jáne ujymdyq qorǵaný quraldarymen, arnaıy kıimmen jáne arnaıy aıaq kıimmen qamtamasyz etpeý – 10,1 paıyz (238).
Jazataıym oqıǵalardyń kópshiligi mynalarǵa baılanysty boldy: qozǵalatyn, aınalatyn zattardyń áseri (199 nemese 13,9%); zardap shegýshiniń bıiktikten qulaýy (171 nemese 11,9%); zattardyń, materıaldardyń qulaýy (152 nemese 10,6%).