Ótken jyly mas júrgizýshiler 424 jol apatyn jasap, 110 adamnyń ómirin qıdy
ASTANA. 11 aqpan. QazAqparat - Byltyr mas kúıinde rýlge otyrǵan júrgizýshilerdiń kinásinen 424 jol-kólik oqıǵasy oryn aldy, saldarynan 110 adam qaza bolyp, taǵy 588-si jaraqattandy.
Bul týraly ІІM Jol polıtsııasy komıtetinen habarlandy.
Keltirilgen málimetterge qaraǵanda, byltyr oryn alǵan barlyq jol-kólik apattarynyń 88 paıyzy nemese 12 407 oqıǵa júrgizýshilerdiń kinásinen bolǵany anyqtaldy. Budan bólek, kólik oqıǵalarynyń 23,4 paıyzy jyldamdyqty asyrý saldarynan, 9,2 paıyzy joldyń qarsy baǵytyna shyǵýdan, 7,9 paıyzy qıylystardan ótý erejelerin buzýdan, 8,7 paıyzy jaıaý júrginshiler jolaǵynan ótý erejelerin buzýdan oryn alǵan.
«Mas kúıinde rýlge otyrǵan júrgizýshilerdiń kinásinen 424 jol-kólik oqıǵasy oryn alyp, onda 110 adam qaza boldy jáne 588 jaraqat aldy. Sondaı-aq, avtobýs júrgizýshileriniń kinásinen 405 oqıǵa jasalǵan. Árbir ekinshi jol-kólik oqıǵasy jaıaý júrginshilerdi soǵýmen (44,3 paıyzy) baılanysty bolyp otyr. Jol apatyna ushyraǵan jaıaý júrginshiler jalpy qaza bolǵandar men jaraqat alǵandardyń sanynyń tıisinshe 29,6 jáne 32,9 paıyzyn quraıdy», - delingen baspasóz habarlamasynda.
«Jol polıtsııasy komıteti jol qozǵalysy qaýipsizdigin qamtamasyz etý jáne joldarda apattylyq deńgeıin tómendetý boıynsha maqsatty baǵattalǵan sharalar qabyldaýda. Sonymen qatar, apattylyq jaǵdaıyna kólik júrgizýshileri men jaıaý júrginshilerdiń joldardaǵy minez-qulqy, erejeni saqtaı bilýi tikeleı áser etedi. Joldaǵy árbir jol qozǵalysyna qatysýshynyń quqyqtyq sanasy ózgergen jaǵdaıda, joldaǵy ahýaldy, ıaǵnı jol apattarynyń sanyn tómendetýge qol jetkize alamyz», - delingen baspasóz baıanynda.
Esterińizge sala ketsek, 2012 jyldyń 12 aıynda 14 168 jol-kólik oqıǵasy tirkelip, olarda 3 022 adam qaıtys boldy, taǵy 17 488 adam túrli dárejede dene jaraqattaryn aldy.
