Ótken jyly Qyzylordada 4 myń otbasy baspanaly boldy - Kósherbaev
QYZYLORDA. QazAqparat-Ótken jyly qarjylandyrýdyń barlyq kózderiniń esebinen Qyzylorda oblysynda 500 myń sharshy metrden astam turǵyn úı paıdalanýǵa berildi. Bul 2015 jyldyń tıisti merzimimen salystyrǵanda 17 paıyzǵa artyq, dep habarlady QazAqparat HAA tilshisi.
Oblys basshysy Qyrymbek Kósherbaevtiń halyqpen eseptik kezdesýinde atap ótkendeı, 2016 jyly memlekettik qarjylandyrýdyń esebinen ǵana 36 kóp qabatty úı paıdalanýǵa berilip, 1864 otbasy jańa turǵyn úıge qol jetkizdi. Ótken jyly Qyzylorda qalasynda barlyǵy 80 kóp qabatty úı salyndy. Ondaǵy 4000 páter 2015 jyldaǵydan 2 esege kóp.
Sondaı-aq bıyl jeke turǵyn úıler qurylysyna qajetti alańdardy ázirleý baǵytynda aýqymdy jumystar atqarylmaq. Bul maqsatqa ótken jyly 17 mlrd teńgeden astam qarjy baǵyttaldy. Budan basqa, kóp jyldardan beri alǵash ret aýdandarǵa da 5 mlrd. teńgeden astam qarjy bólindi.
«Injenerlik-kommýnıkatsııalyq ınfraqurymnyń qurylysyn aýqymdy túrde júrgizý turǵyn úı qurylysynyń jandanýyna ákeledi. Máselen, byltyr oblys ortalyǵynda 980 ga aýmaqty alyp jatqan «Báıterek» jańa shaǵynaýdany ashyldy. Onda 6600 jeke jer telimderinde 36 myńnan astam halyq turatyn bolady. Bul degenimiz - tolyqqandy kishigirim qalashyqqa aınalady degen sóz»,- dedi oblys ákimi.
Sońǵy úsh jylda oblys ortalyǵynda tıimdi turǵyn úı baǵdarlamasynyń arqasynda 11 shaǵynaýdan boı kóterdi.
«Munan bólek, «Qyzylorda-Jezqazǵan» tas jolynyń boıynda 150 ga jer teliminiń jumys jospary daıyn tur. Kelesi kezeńde osy aýmaqtyń ınjenerlik ınfraqurylymyn júrgizýdi bastaımyz. Bul jumystar barysynda taǵy da qosymsha 1200 jer telimin bólýge múmkindik týady»,- dedi Qyrymbek Kósherbaev.
Oblys ákimi Qyzylorda qalasynda turǵyn úı kommýnaldyq sharýashylyǵyn jańǵyrtý máseleleri de qarqyndy júrgizilip jatqanyna toqtalyp ótti.
«Jergilikti bıýdjet qarajaty esebinen kópqabatty apatty úıler máselesin de sheshetin bolamyz (38 úı, 503 páter). 2016 jyly apatty úılerde turǵan 324 otbasyna jańa páter berildi. Osylaısha, búginde biz apatty páterlerdiń 60 paıyzǵa jýyǵynyń máselesin sheshtik (qalǵany - 32 úı, 179 páter). 2017 jyly bıýdjet múmkindigine qaraı bul jumysty jalǵastyratyn bolamyz»,- dedi aımaq basshysy.
