Ótken jyly kúndizgi statsıonarda 1 mln-nan astam adam emdeldi – Bolat Tókejanov

NUR-SULTAN. QazAqparat – Ótken jyly ambýlatorııalyq deńgeıde halyqqa 215 mıllıonǵa jýyq qyzmet kórsetildi. Bul týraly Ortalyq kommýnıkatsııalar qyzmetinde ótken brıfıngte Áleýmettik medıtsınalyq saqtandyrý qorynyń Basqarma tóraǵasy Bolat Tókejanov aıtty, dep habarlaıdy QazAqparat tilshisi.

«110 mıllıon qabyldaý, onyń ishinde 33 mıllıonǵa jýyq beıindi mamandardyń qabyldaýy, 65 mln zerthanalyq dıagnostıka qyzmeti, shamamen 28 mln protsedýra men manıpýlıatsııa, 11 mln dıagnostıkalyq qyzmet, onyń ishinde 454 myń KT / MRT, 2,8 mln ÝDZ, 13,5 myń PET dıagnostıkasy kiredi. Emhanalar arqyly kórsetilgen barlyq konsýltatsııalyq-dıagnostıkalyq qyzmettiń negizgi bóligi medıtsınalyq saqtandyrý esebinen tólengen», - deıdi Áleýmettik medıtsınalyq saqtandyrý qorynyń Basqarma tóraǵasy Bolat Tókejanov.

Onyń aıtýynsha, ótken jyly kúndizgi statsıonarǵa 1 mln-nan astam adam jatyp emdeldi, onyń ishinde TMKKK sheńberinde – 508 myń jáne MÁMS júıesinde - 578 myń emdeýge jatqyzý (áleýmettik máni bar aýrýlardy esepke almaǵanda).

«2,7 mln-ǵa jýyq patsıent táýlik boıy jumys isteıtin statsıonarlarda (áleýmettik máni bar aýrýlardy esepke almaǵanda) em aldy. Aýrýhanaǵa jatqyzýdyń jalpy qurylymynda shuǵyl kómek 62%-dy qurasa da, shuǵyl jatqyzý jaǵdaılary aıtarlyqtaı tómendegenin atap ótken jón. Josparly emge qoljetimdilik te artty: patsıentterdiń 86% bir kúnnen on kúnge deıingi merzimde statsıonarlarǵa ornalastyryldy jáne tek 5%-y 30 kúnnen astam ýaqyt kútti. 2019 jyly bir aıdan astam ýaqyt aýrýhanaǵa jatqyzýdy kútken patsıentter sany 12% jetken bolatyn», - deıdi ol.