Ótken jyly kóliktiń barlyq túrimen júk tasymaldaý tómendedi - mınıstr

NUR-SULTAN. QazAqparat – Ótken jyly konteınerlik júkterdi tranzıttik tasymaldaý 32 paıyzǵa artty. Bul týraly Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Kólik salasynda naqty kólem ındeksi 2020 jyly 82,8 paıyzdy qurady. Oǵan negizinen naýryz aıynda engizilip, jyl sońyna deıin sozylǵan lokdaýn áser etti. Dástúrli segmentterde tasymal kólemi tómendese de, konteınerlik júkterdi tranzıttik tasymaldaýda oń nátıje boldy», - dedi mınıstr.

Onyń aıtýynsha, 2019 jylmen salystyrǵanda tranzıttik konteınerlerdiń jalpy kólemi 876 myń jıyrma fýnttyq balamany qurady. Ósim 32 paıyz boldy.

«Kóliktiń barlyq túrimen júk tasymaldaý kólemi 3,96 mlrd tonnany nemese 2019 jylmen salystyrǵanda 94,3 paıyzdy qurady», - dedi Beıbit Atamqulov.