Ótken jyly qoǵamdyq mańyzy bar 188 kitap basylǵan

ASTANA. QazAqparat – Mádenıet jáne sport vıtse-mınıstri Nurǵısa Dáýeshov baspa isi salasyndaǵy jaǵdaı týraly aıtty, dep habarlaıdy QazAqparat tilshisi.

«Byltyr bul salada aýqymdy jumystar atqaryldy. Qoǵamdyq mańyzy bar 188 kitap 506 myń danamen basylyp, barlyq oblystyq, aýdandyq kitaphanalarǵa taratyldy. Ataýly kúnder men mereıtoılarǵa oraı, 2022 jyly Ahmet Baıtursynulynyń 150 jyldyǵyna 12 tomdyǵy, Muhtar Áýezovtiń 125 jyldyǵyna 5 tomdyǵy basylyp shyqty. Atalmysh baǵytta Roza Baǵlanova, Talǵat Bıgeldınov, Mánshúk Mámetova, Ázilhan Nurshaıyqov, Asanbaı Asqarov sııaqty birtýar tulǵalar týraly eńbekter jaryq kórdi», - dedi N. Dáýeshev mınıstrliktiń alqa májilisinde.

Onyń aıtýynsha, qalamgerlerdi qoldaý, qalamaqy tóleý, jańa týyndylardyń jaryqqa shyǵýyna, taralýyna qoldaý maqsatynda 48 avtordyń qoljazbasy satyp alyndy.

Budan buryn habarlanǵandaı, byltyr Qazaqstan tarıhyna qatysty 7 myńnan astam qujat elge ákelingen.

Elimizde 20-ǵa jýyq memlekettik arhıv ǵımaratyn salý kerek.