Ótken jyly Qazaqstanǵa qansha ózbek azamaty keldi
NUR-SULTAN. QazAqparat – Parlament Senatynyń jalpy otyrysynda «Qazaqstan Úkimeti men Ózbekstan Úkimeti arasyndaǵy Zańsyz kóshi-qonǵa qarsy kúrestegi yntymaqtastyq týraly kelisimdi ratıfıkatsııalaý týraly» Zań qabyldandy, dep habarlaıdy QazAqparat tilshisi.
Kelisimge 2019 jyly sáýirde Tashkent qalasynda eki el syrtqy ister mınıstrleri qol qoıdy. Kelisimdi ratıfıkatsııalaý kóshi aǵyndaryn retteý, azamattardyń máselelerin sheshý jáne zańsyz kóshi-qon jelilerin anyqtaý úshin qolaıly jaǵdaılar jasaıdy.
«Statıstıka boıynsha 2019 jyly shekara arqyly 6 mln azamat kirgen, onyń ishinde 2,5 mıllıony ózbek azamaty. 1,5 mıllıony tranzıt arqyly basqa elge ketken, al 1 mıllıon azamat elimizde tirkelgen, onyń ishinde 500 myńnan astamy ýaqytsha kelip, jumys istegender. Osy kelisim arqyly qos azamattyqty joıyp, ulttyq qaýipsizdikti qamtamasyz etemiz. Negizi, Qazaqstan men Ózbekstan memleketterinde zań boıynsha qos azamattyq joq», - dedi QR Іshki ister mınıstri Erlan Turǵymbaev.
Onyń sózine qaraǵanda, ózbek tarapy kelisimdi ratıfıkatsııalaý tártibin aıaqtady.
Atap aıtqanda, taraptar kóshi-qonmen aınalysatyn quzyretti organdar qyzmetkerlerin daıarlaý jáne olardyń biliktiligin arttyrý, zańsyz kóshi-qonǵa qarsy is-qımyl jónindegi birlese jedel-profılaktıkalyq is-sharalardy uıymdastyrý túrindegi yntymaqtastyqty júzege asyrady.
