Ótken jyly qazaqstandyqtarǵa 1,1 mln memqyzmet kórsetildi

ASTANA. QazAqparat - 2022 jyldyń qorytyndysy boıynsha qazaqstandyqtarǵa proaktıvti formatta 1,1 mln túrli memlekettik qyzmet kórsetildi. 2021 jylmen salystyrǵanda osy ádisti paıdalanǵan alýshylardyń sany eki esege ósti, dep habarlaıdy QazAqparat Eńbek mınıstrligine silteme jasap.

Qyzmet kórsetýdiń proaktıvti formaty qandaı? Bul kezde adam qandaı da bir qyzmetke júginbeıdi, al memleket ony úıden shyqpaı-aq belgili bir ómirlik jaǵdaı týyndaǵan kezde alýdy usynady. Ol úshin tek SMS-habarlamaǵa jaýap berý kerek.

Proaktıvti qyzmetter kórsetý kezinde qujattardy jınaýdyń qajeti joq, barlyq málimetter memlekettik derekter bazasynan elektrondyq túrde alynady.

Búgingi tańda proaktıvti formatta áleýmettik-eńbek salasynyń 23 memlekettik qyzmeti kórsetiledi. Olardyń ishindegi eń suranysqa ıe bolǵandary:

– jumyssyzdardy tirkeý (347 myń);

– bala týýǵa jáne bala kútimine járdemaqy taǵaıyndaý (215 myń);

– bala kútimine baılanysty tabysynan aıyrylǵan jaǵdaıda áleýmettik tólem taǵaıyndaý (179 myń);

– ınflıatsııa deńgeıin eskere otyryp, naqty engizilgen mindetti zeınetaqy jarnalarynyń, mindetti kásiptik zeınetaqy jarnalarynyń somasy men zeınetaqy jınaqtarynyń somasy (memlekettik kepildik) arasyndaǵy aıyrmany tóleý (127 myń);

– múgedektikti jáne/nemese eńbekke qabilettiliginen aıyrylý dárejesin belgileý jáne/nemese qajetti áleýmettik qorǵaý sharalaryn aıqyndaý (57 myń).

Budan basqa birqatar basqa qyzmetterdi túrlendirý jáne jeńildetý boıynsha jumystar júrgizilýde.

Buryn densaýlyǵynan aıyrylǵan azamattar múgedektik belgileý kezinde, sondaı-aq ońaltýdyń járdemaqylary men tehnıkalyq quraldaryn alý kezinde tórt túrli ınstantsııaǵa: emhanaǵa, MÁS bólimine, HQKO-ǵa jáne ákimdikke júginýge májbúr bolatyn.

Endi ótinish berýshi tek turǵylyqty jeri boıynsha emhanaǵa júginedi, al qalǵan protsester aqparattyq júıelerdi ıntegratsııalaý esebinen adam qatysýynsyz ótedi.

Múgedektik belgilengennen keıin ótinish berýshige ózine senip tapsyrylǵan tehnıkalyq ońaltý quraldary men áleýmettik qyzmetterdi proaktıvti túrde alý úshin tek kelgen SMS-habarlamaǵa jaýap berý qajet jáne múgedektigi bar adamdy ońaltý men abılıtatsııa jeke baǵdarlamasyna (OAJB) sáıkes oǵan qoljetimdi barlyq sharalar avtomatty túrde áleýmettik qyzmetter portalyna jiberiletin bolady. Jyl qorytyndysy boıynsha 55 myńnan astam azamat OTQ jáne áleýmettik qyzmetterdi belsendi túrde resimdedi.

Budan basqa aǵymdaǵy jyldyń 1 qańtarynan bastap Memleket basshysynyń tapsyrmasyna sáıkes otbasynyń ál-aýqatyn jáne memlekettik qoldaýdyń tıisti sharalaryn aıqyndaıtyn «Otbasynyń tsıfrlyq kartasy» jumys rejıminde iske qosyldy.