Ótken jyly qazaqstandyq áýe kompanııalary 7,9 mln adamdy tasymaldady
ASTANA. QazAqparat - 2018 jyly qazaqstandyq avıakompanııalar 8 mln-ǵa jýyq adamdy tasymaldady. Tranzıttik jolaýshylar sany 40% kóbeıdi, dep habarlaıdy QazAqparat Azamattyq avıatsııa komıtetine silteme jasap.
«Qazaqstannyń azamattyq avıatsııa salasyn damytýda oń dınamıka saqtalyp otyr. Eń aldymen, jolaýshylar aǵynynyń artqany baıqalady. 2018 jyldyń qorytyndysy boıynsha qazaqstandyq áýekompanııalar 7,9 mln adam tasymaldady, bul - 2017 jylǵy kórsetkishten 7% artyq. Jalpy, otandyq áýejaılarda 14 mıllıonnan astam jolaýshyǵa qyzmet kórsetilgen», - dep habarlady komıtet Telegram-daǵy resmı paraqshasynda.
Tranzıttik jolaýshylardy tasymaldaýda da 40% ósim tirkeldi. 2018 jyly shamamen 900 myń adam tranzıttik saparmen kelgen.
«El halqynyń basym bóligin áýe kóligimen qamtamasyz etý úshin bıyl tómen bıýdjetti alǵashqy ulttyq Fly Arystan avıakompanııasyn iske qosý josparlanǵan. Atalǵan uıym óz qyzmetiniń alǵashqy jyly keminde 1 mln jolaýshyny tasymaldaýdy josparlap otyr», - dep tolyqtyrdy komıtet.
Halyqaralyq tasymaldaý salasynda turaqty damý baıqalady. 2018 jyly qazaqstandyq jáne sheteldik avıakompanııalar 14 jańa reıs ashqan: Atyraý-Frankfýrt, Astana-Qazan, Astana-Túmen, Astana-Vılnıýs, Astana-Chelıabi, Astana-Krasnodar, Astana-Tomby, Astana-Sochı, Astana-Dýshanbe, Rıga-Almaty («Air Baltic»), Novosibir-Pavlodar («Sıbır»), Krasnoıar - Almaty («Angara»), Máskeý-Qyzylorda («Aeroflot»), Helsınkı-Astana («Finnair»).
2013 jyly Qazaqstan áýejaılary 73 baǵyt boıynsha qyzmet kórsetse, 2018 jyly - 96 baǵytqa deıin artqan. Qazirgi ýaqytta Qazaqstanǵa 23 halyqaralyq avıakompanııa turaqty reıster jasap otyrady.
«EKSPO-2017» kórmesin ótkizý men «ashyq aspan» rejımin engizýge baılanysty Qazaqstannyń áýe naryǵyna alty jańa sheteldik kompanııa keldi olar - Air China, LOT, WizzAir, Finnair, Air Baltic jáne Ural Airlines avıakompanııalary. Sonymen qatar, Turkish Airlines pen «Aeroflot» áýe reısteriniń jıiligin arttyryp, áýe qozǵalysyn keńeıtip jatyr.
«Otandyq avıakompanııalar da reısterdiń aýmaǵyn keńeıtip, halyqaralyq baǵyttarǵa reıster jıiligin arttyrýda. Qazaqstandyq áýe kompanııalary úshin Eýroodaq elderine ushýda esh shekteý joq. Qazirgi ýaqytta jeti otandyq áýe kompanııasy - Air Astana, Prime Aviation, KazAirJet, SCAT, Comlux-KZ AK, JetAirlines jáne FFlyJet.kz - EASA avtorızatsııasyn sátti ótkizdi jáne Eýropaǵa ushý quqyǵyn ıelendi», - delingen habarlamada.
EKSPO-2017 kórmesi kezeńinde Qazaqstan arqyly júretin qytaılyq azamattar úshin 72 saǵattyq vızasyz rejım bastamasy iske asyryldy. 2018 jyldan bastap, bul rejım Úndistan azamattaryna da qoljetimdi boldy. Qos eldiń azamattary úshin vızasyz tranızttik rejım 2019 jyldyń sońyna deıin óz kúshinde qalady.
