Ótken jyly Qazaqstanda 17 myńnan astam paıdalanbaǵan jer ýchaskeleri anyqtaldy - Ó.Ózbekov
ASTANA. 30 naýryz. QazAqparat /Serik Sabekov/ - Byltyrǵy jyly Qazaqstanda 3 mıllıon gektarǵa jýyq aýmaqty quraıtyn 17 myńnan astam paıdalanbaǵan jer ýchaskeleri anyqtaldy.
Bul týraly búgin Astanada ótken onlaın jelidegi konferentsııa barysynda QR Jer resýrstaryn basqarý jónindegi agenttik tóraǵasy Ómirzaq Ózbekov málim etti.
Ó.Ózbekovtyń aıtýynsha, 1 mıllıon 600 myń gektar aýmaqtaǵy 4,9 myń jer ýchaskesi ıesi joq aýmaq retinde tirkeýge alynǵan. Aýyl sharýashylyǵyna arnalǵan jerlerge qatysty 3,5 mıllıon gektar aýmaqqa 1884 tekserý júrgizilip, sonyń nátıjesinde jalpy aýmaǵy 536 myń gektar jerde 879 tártip buzýshylyq pen zań talaptarynyń oryndalmaý faktileri anyqtaldy.
«Tekserý qorytyndylary boıynsha aýyl sharýashylyǵyna arnalǵan 271 myń gektar aýmaq jerdi paıdalanbaǵany jáne tıimsiz paıdalanǵany úshin 579 sýbekt ákimshilik jaýapkershilikke tartylsa, onyń ishinde 443 sýbektige jalpy somasy 17 mıllıon teńge kólemindegi aıyppul salyndy», - deıdi QR Jer resýrstaryn basqarý jónindegi agenttiktiń basshysy.
