Ótken jyly Qazaqstanda 17 878 jańa avtokólik satyldy

Bul týraly «Qncepto» konsaltıngtik kompanııasy jasaǵan resmı kólik dıllerleriniń 2009 jylǵy qorytyndysynda jarııalandy, dep habarlaıdy QazAqparat.

Qorytyndy esep kórsetkendeı, ótken jylǵy satylym kórsetkishi 2008 jylmen salystyrǵanda 51,2 paıyzǵa azaıǵan. Elimizde kólikke suranys tek ótken jyldyń jeltoqsan aıynda ǵana qatty bolypty. Dıllerler bul aıda 2 330 avtokólik satypty. Bul basqa aılarmen salystyrǵanda 56,4 paıyzǵa artyq. Alaıda konsaltıngtik kompanııanyń ókilderi bul jańa tarıfter engizý aldyndaǵy, eski baǵamen kólik alyp qalsam degen jantalas qana, jańa tarıf engizilip, jańa baǵa qoıylǵan soń, bul suranys saıabyrsıdy deıdi. Esep boıynsha ótken jyly elimizde Fiat jáne Ford avtokólikterine birde-bir suranys bolmapty. Al Renault pen Opel, Cadillac kólikteri birneshe danadan ǵana satylǵan. Al eń joǵary suranysqa- 434 danasy satylǵan Suzuki markaly kólikter ıe bolǵan. Bul 2008 jylmen salystyrǵanda 56,1 paıyzǵa joǵary. Jalpy, ótken jyly elimizde japon avtokólikterine suranys 2 esege artqan. Suranys joǵary bolǵan kólikter qatarynda 2008 jylmen salystyrǵanda 50,3 paıyz ósim kórsetken Mercedes-Benz bar. Ótken jyly bul markanyń 251 danasy satylǵan. 2008 jyly 167 dana satylǵan edi. Al BMW 11,6 paıyzǵa ósim kórsetip, X6 jáne 7 serııaly markanyń 164 danasyn satqan. Osy eki markanyń týysy Audi ótken jyldy 76-aq kólik satylyp, jyldy 16,5 paıyzdyq quldyraýmen aıaqtapty. Porsche men Skoda-ǵa suranys 24,4 paıyzǵa azaıǵan. Joǵaryda atap ótken Fiat, Ford syndy suranyssyz kólikterdiń qataryn KIA (- 77,2%), Volkswagen (-69,2%) jáne Hyundai (- 68,1%) tolyqtyrǵan. Al tabysty satylymdaǵy kólikterdiń qatarynda reseılik AvtoVAZ ónimderi kósh bastap tur. Ótken jyly elimizde bul markanyń 3 681 danasy satylǵan. Al Toyota 3 006, taǵy bir Reseılik ónim ÝAZ 2 328 danasy ıesin tapqan. Al Mitsubishi 2 073, Ózbekstandyq Daewoo 1 403, Nissan 675, Chevy Niva 668, Volkswagen 664, Hyundai 653, Skoda 563 avtokólik satqan. Al bulardyń ishinde jeke markalar boıynsha ÝAZ avtokóligi satylym boıynsha kósh bastap, 2 225 qazaqstandyqty qýantqan. Al VAZ-dyń 7-shi markasyn 1 257 adam satyp alǵan. Óskemende qurastyrylatyn Lada 4x4 markasyn 1 051, Daewoo Nexia kóligine 906 adam ıe bolypty. Ótken jyly 2008 jyly satylym boıynsha jaqsy qarqyn kórsetken Toyota Camry, Toyota Corollaǵa suranys tómendegenin kórsetti. Jalpy satylym boıynsha 2009 jyldyń qorytyndysy nátıjesinde "BIPEK AVTO" eń joǵary kórsetkishti ıelengen. Odan keıingi oryndarda "Merkýr-avto", "Astana motors", "Toıota Jetisý ortalyǵy".