Ótken jyly Qarýly Kúshterde 900 nysan jóndeýden ótti

NUR-SULTAN. QazAqparat - Qazaqstan Qarýly Kúshteriniń ınfraqurylymyn kútip ustaý men damytý sheńberinde 2020 jyly birqatar jańa joba júzege asty. Atap aıtqanda, áskerı qalashyqtardy kórkeıtý aıasynda alǵash ret 19 sport jáne 9 balalarǵa arnalǵan oıyn alańy ornatyldy, dep habarlaıdy QazAqparat.

Semeı jáne Almaty qalalaryndaǵy zaýyttarda torly 3D panelder óndirisiniń eki jelisi qurylyp, iske qosyldy. Bul - panel túrindegi qorshaýlar. Obektilerdiń boljamdy ónimdiligi aıyna 4 400 paneldi nemese 11 000 metrdi quraıdy.

Almaty, Jambyl, Qaraǵandy jáne Semeı garnızondarynda tórt jóndeý-qalypqa keltirý zaýyty irgesin kóterdi.

Atalmysh bólimshelerdiń qyzmetiniń arqasynda 2020 jyly 105 mln teńge únemdeýge, sondaı-aq atqarylǵan jumystardyń sapasy men merzimin aıtarlyqtaı jaqsartýǵa múmkindik boldy.

Almatyda qorshaǵan ortaǵa zııandy zattardyń shyǵýyn azaıtý, sondaı-aq jylý energııasyn óndirý shyǵyndaryn ońtaılandyrý maqsatynda eki qazandyqty gazben qamtamasyz etýge kóshirý jobasy iske qosyldy.

Jalpy alǵanda eki qazandyqty gazben qoldanýǵa aýystyrý jyl saıyn shamamen 500 mln. teńgeni únemdeýge múmkindik beredi.

Budan ózge, 2020 jyly shamamen 900-ge jýyq obektige aǵymdaǵy jóndeý jumysy júrgizildi. Olar - 175 saqtaý obektisi, 74 ákimshilik jáne 37 turǵyn úı nysany, Aıagóz garnızonynyń 34 obektisi (2020 jyly maýsymdaǵy TJ saldaryn joıý, á/b garnızonnyń obektilerin daýyl jel zaqymdady).

101 nysannyń shatyry men qasbetine jóndeý júrgizildi. 178 obektide káriz, sýmen jabdyqtaý, gazdandyrý jelileri jáne basqa da kommýnıkatsııalar jóndeldi.

2019 jylmen salystyrǵanda aǵymdaǵy jóndeý jumystarynyń úlesi 88% artty.

Shyǵys Qazaqstan, Jambyl, Qaraǵandy oblystarynyń jergilikti atqarýshy organdary oq-dári saqtaý oryndaryn qazý kezinde paıdalanylatyn topyraq pen qumdy óz betinshe óndirýge jer ýchaskelerin bólý máselesin pysyqtap jatyr.

Bul materıaldardy satyp alý shyǵynyn edáýir qysqartady dep kútilýde.

Joldar men jol tósemderine aǵymdaǵy jóndeý jumystaryn júrgizý kórsetkishi 49%-ǵa artty.

Bıyl 188,5 myń sharshy metr joldyń betin beton asfaltpen jabý, sol sııaqty 11 myń metrden astam bordıýrdi ornatý jumysy oryndaldy.