Ótken jyly Qaraǵandyda aýyz qýysy kúıgen 50-ge jýyq bala aýrýhanaǵa túsken
QARAǴANDY. QazAqparat - 2019 jyly Qaraǵandy oblystyq balalar klınıkalyq aýrýhanasyna «aýyz qýysyn, óńeshti ártúrli dárejede kúıik shalý» dıagnozymen 1-6 jas aralyǵyndaǵy 47 bala túsken, dep habarlaıdy QazAqparat tilshisi.
Osyndaı dıagnozben kelip túsken balalar kóbine, dálirek aıtqanda, 17 jaǵdaıda áınek jýýǵa, qazan, plıta tazalaýǵa, basseınge arnalǵan suıyqtyqtardy, «Kometti», jıhazǵa arnalǵan lak, «Sanoks» sııaqty túrli tazalaý quraldaryn iship qoıǵan. 14 bala kalıı permanganat eritindisinen (margantsovka) hımııalyq kúıik alǵan. 10 bala - sirke sýy essentsııasy, 2 bala sýtegi asqyn totyǵymen jáne 1 bala atsetonmen óńeshterin kúıdirgen. Qyzmettik tekserý jáne anamnez jınaý barysynda bul balalar qysqa ýaqytqa qaraýsyz qalyp qoıǵany anyqtalǵan.
Álemdi zertteıtin naǵyz beımaza kezinde búldirshindi ne qyzyqtyrady? Bul - tazalaǵysh quraldardyń jarqyn oramy. Alaıda osy quraldardyń qorshaǵan ortaǵa qoljetimdiligi, bala úshin qaýipsiz ortanyń bolmaýy qaıǵyly oqıǵalarǵa alyp keledi.
Balada hımııalyq kúıik hımııalyq agressıvti zattarmen tikeleı baılanystyń saldarynan bolady. Mundaı zattarǵa qyshqyldar, siltiler, kásibı turmystyq hımııa jatady. Ókinishke qaraı, turmysta mundaı jaǵdaılar az emes. Balalar qorshaǵan ortany belsendi túrde ıgeredi jáne onyń qoly jetetin jerde ornalasqan zattardyń barlyǵyn aýzyna salady.
«Eger balanyń terisin kúıik shalǵan bolsa, qalǵan suıyqtyqty qurǵaq matamen súrtip tastaý kerek, sodan keıin zaqymdanǵan jerdi 20 mınýt boıy jyly sýmen jýý kerek», - dep túsindiredi Qaraǵandy oblysynyń Densaýlyq saqtaý basqarmasynyń mamandary.
Bala kıimine hımııalyq untaq jaǵyp alǵanyn baıqap qalsańyz, ol kıimdi basy arqyly sheshpeńiz, sebebi hımııalyq zat sábıdiń beti men kózine tıip, zaqym keltirýi múmkin. Mundaı kıimdi kesip, sheship tastańyz.
Eń qıyn jaǵdaı bala hımııalyq zatty jutqan kezde bolady. Onyń ne ishkenin anyqtaý úshin múmkindiginshe bastapqy qaptamany saqtaý mańyzdy.
«Balalardyń 43%-da kúıik aýyr boldy. Bala uzaq ýaqyt jansaqtaý bóliminde jatady. Ókinishke qaraı, olardyń basym bóliginde sepsıs, medıastenıt, óńesh tarylýy sekildi aýyr asqynýlar paıda boldy, bul tipti múgedektikke de alyp keledi», - deıdi dárigerler.
Odan keıin de balalar birneshe jyl boıy asqazandaǵy tútikshe arqyly tamaqtanady, josparly túrde hırýrgııalyq bólimshege óńesh býjırleý protsedýrasynan ótedi. Ol degenimiz tamaq ótý múmkindigin jasaý úshin óńesh qýysyn mehanıkalyq keńeıtý degendi bildiredi.
