Ótken jyly qansha býhgalter jaýapkershilikke tartyldy
NUR-SULTAN. QazAqparat – Búginde saladaǵy ereje buzýshylyqtyń negizgi kólemi býhgalterlik esepti júrgizý tártibimen baılanysty. Bul týraly aýdıtorlyq qyzmetke qatysty zań jobasy tanystyrý kezinde Májilis depýtaty Omarhan Óksikbaev málim etti, dep habarlaıdy QazAqparat tilshisi.
«Atalǵan zań jobasynda memlekettik mekemelerde elektrondy býhgalterlik esepti engizýdi qarastyryp otyrmyz. Osyndaı qadamdar búginde barlyq memlekettik organdarda júrgizilýde. Atalǵan norma býhgalterlik esepti júrgizý erejelerin buzýdyń aldyn alýǵa baǵyttalǵan. Búginde saladaǵy ereje buzýshylyqtyń negizgi kólemi býhgalterlik esepti (77 paıyz) júrgizý tártibimen baılanysty», - dedi O. Óksikbaev.
Onyń sózine qaraǵanda, Qarjy mınıstrligi Іshki memlekettik aýdıt komıtetiniń málimeti boıynsha 2019 jyly 59 mln teńge somasyna ákimshilik jaýapkershilikke 1 400-den astam býhgalter tartyldy.
«Jalpy alǵanda zań jobasyn qabyldaý jáne iske asyrý memlekettik bıýdjetten qosymsha qarjylyq shyǵyndardy talap etpeıdi, teris áleýmettik-ekonomıkalyq jáne quqyqtyq saldarǵa ákep soqpaıdy jáne memlekettik aýdıt júıesi men aýdıtorlyq qyzmetti odan ári jetildirýge yqpal etedi», - dedi depýtat.
Budan buryn habarlanǵandaı, búgin Parlament Májilisinde Qazaqstan Respýblıkasynyń keıbir zańnamalyq aktilerine aýdıtorlyq qyzmet máseleleri boıynsha ózgerister men tolyqtyrýlar engizý týraly» zań jobasy tanystyryldy.
Qujat aıasynda aýdıtorlyq qyzmetti retteý jónindegi táýelsiz organdy qurý, ıaǵnı Kásibı keńestiń jumysyn uıymdastyrý eskerilgen.
