Ótken jyly ishki týrıster sany 50% ósti

NUR-SULTAN. QazAqparat – Ótken jyly Qazaqstanda ishki týrıster kóbeıip, sheteldik týrıster azaıǵan. Bul týraly QR Mádenıet jáne sport mınıstri Dáýren Abaev aıtyp berdi, dep habarlaıdy QazAqparat tilshisi.

«2021 jyldyń qorytyndysy boıynsha ishki týrıster sany 50% ósti. Bul – 6,9 mln adam. Atalǵan kórsetkish pandemııaǵa deıingi kezeńmen salystyrǵanda shamamen 300 myń adamǵa joǵary. Sonymen qatar 2021 jyldyń qorytyndysy boıynsha sheteldik týrıster sany azaıdy, bunyń sebebin karantındik sharalar men syrtqy shekaralardyń jabyq bolýymen baılanystyramyz», - dedi D. Abaev Úkimet otysynda.

Ulttyq saıabaqtarǵa kelýshilerdiń de sany artty. Іle-Alataýy (212 myńnan 430 myńǵa deıin), Kólsaı (83 myńnan 160 myńǵa deıin), Sharyn (16 myńnan 35 myńǵa deıin) sııaqty ulttyq parkterge kelýshiler sanynyń eselep ósýi erekshe baıqalady.

«2020 jylmen salystyrǵanda ornalastyrý oryndarynyń sany 172 danaǵa artyp, 3 686 qonaqúıdi qamtydy. Nómirlik qor ósip, 193 myń tósek-orynǵa jetti. Bir ǵana Túrkistan oblysynda 40 qonaq úı ashylǵan. Negizgi ósý ishki týrıster sanynyń artýymen baılanysty bolyp otyr. Mysaly, Aqmola oblysynda kórsetiletin qyzmetter kólemi 3 mlrd teńgege jýyq, Mańǵystaý jáne Túrkistan oblystarynda 2 mlrd teńgege, Shymkent qalasynda 1 mlrd teńgege ósken», - dedi Dáýren Abaev.

Buǵan deıin Dáýren Abaev balalar men jasóspirimder arasyndaǵy ishki týrızm jobalary týraly aıtyp bergen edi.