Ótken jyly eńbek zańyn buzǵandarǵa 440 mln. teńgeni quraıtyn 12 myńnan astam ákimshilik aıyppul salyndy
Bul týraly búgin QR Prezıdenti janyndaǵy Adam quqyǵy jónindegi komıssııanyń otyrysynda QR Eńbek jáne halyqty áleýmettik qorǵaý vıtse-mınıstri Birjan Nurymbetov málim etti.
Onyń atap ótýinshe, ótken jyly halyqty jumyspen qamtý salasyndaǵy zań buzýshylyqtardyń 758 faktisi nemese 87 paıyzy jumys berýshilerdiń eńbekpen qamtý ókiletti organdaryna bos jumys ornynyń bar ekendigi týraly málimetterinde oryn alǵan. Sonymen qatar tekserý barysynda arnaıy ruqsat qaǵazy joq sheteldik azamattardy jumysqa tartýdyń 75 zań buzýshylyǵy jáne 87 zańsyz sheteldik jumysshy anyqtalǵan.
«Atalǵan zań buzýshylyqtar boıynsha memlekettik eńbek ınspektorynyń ony joıý týraly uıǵarymy berildi. Jalpy somasy 440 mln. teńgeni quraıtyn 12 myńnan astam ákimshilik aıyppul salyndy. 2011 jyldyń sońynda onyń 392 mln. teńgesi bıýdjetke óndirildi», - dedi vıtse-mınıstr.
B.Nurymbetovtiń atap ótýinshe, atalǵan zań buzýshylyqtarǵa kináli tulǵalarǵa qatysty 2770 is quqyq qorǵaý organdaryna jiberilip, onyń ishinde 63 fakti boıynsha qylmystyq is qozǵalǵan.
