Ótken jyly elordanyń Almaty aýdanynda 42 úıdiń shatyry jóndeldi

ASTANA. 14 aqpan. QazAqparat - 2012 jyly Almaty aýdanynda jylý maýsymyna daıyndyq pen jóndeý jumystaryna bólingen qarjy ornymen ıgerilip, josparlanǵan barlyq jumystar oryndaldy,

dep habarlady Astana qalasynyń resmı saıty aýdan ákimdiginiń baspasóz qyzmetine silteme jasap.

Ákimdik ótken jyly energetıka jáne kommýnaldyq sharýashylyq salasyndaǵy jumystardyń turaqtylyǵyn saqtaý úshin birqatar sharýalar atqardy. Atap aıtqanda, 42 turǵyn úıdiń shatyry jóndeldi, 44 úıdiń jylýmen jabdyqtaý júıesi aýystyryldy, 21 úıde jańa jylytý quraldary ornatyldy, 141 kireberis jóndeldi, terezeleri aýystyryldy, beınebaqylaý kameralary ornatyldy, 63 turǵyn úıdiń sýmen jabdyqtaý jáne káriz júıeleri aýystyryldy, 86 úıdiń elektr júıesi jóndeldi.

Elbasy men qala ákiminiń turǵyndarmen qarym-qatynasty nyǵaıtý jónindegi tapsyrmasyn oryndaý maqsatynda, PIK tóraǵalaryn baǵalaýǵa qatysty turǵyndar arasynda saýalnama júrgizildi. 85 PIK tóraǵasy jumysyn oıdaǵydaı atqarǵan, 18 tóraǵanyń ústinen shaǵym tústi, 4 tóraǵa jumysynan bosatyldy.

«Bul jumys bıyl da jalǵasady, sondyqtan barlyq turǵyndardy belsendi bolýǵa shaqyramyz», - deıdi ákimdik qyzmetkerleri.