Ótken jyly elordalyqtar 545 tonna negizgi azyq-túlik tutyndy
ASTANA. 19 qańtar. QazAqparat - Qazirgi kezde elordada 773 myńnan astam turǵyn bar. Qala halqy 2012 jyly sút, et, kókónis, taǵy basqa da áleýmettik mańyzdy 545 000 tonna azyq-túlik taǵamdaryn tutynǵan.
Bul 2011 jylmen salystyrǵanda 30 000 tonnaǵa kóp, dep habarlady Astana qalasynyń resmı saıty Aýyl sharýashylyǵy basqarmasynyń bastyǵy Murat Dalabaevqa silteme jasap.
Basqarmanyń málimetteri boıynsha, ótken jyly astanalyqtardy tamaqtandyrýǵa 10 054 t birinshi sortty bıdaı uny, 54 694 t aq nan, 7 579 t makaron ónimderi, 88 939 t kartop, 99 767 t kókónis, 38 901 t et (jylqy, sıyr, qoı, shoshqa), 165 505 t sút jáne sút ónimderi, 10 054 t jumyrtqa, 21 809 t qant, 1 547 t qara qumyq jáne 4 640 t basqa da (arpa, manna, suly, tary) jarmalar jumsalǵan.
Aıtý kerek, qala tek ózin 13% negizgi taǵamdarmen qamtamasyz ete alady. Qalǵan bóligi (35%) Astananyń azyq-túlik beldeýinen, Qazaqstannyń basqa aımaqtarynan (18%), sondaı-aq, shetelden (34%) jetkiziledi.
Máselen, ótken jyly qalada 13 000 t sút jáne sút ónimderi óndirilse, 62 892 t Aqmola oblysynan, 26 000 t - Qaraǵandy oblysynan, 7 521 t - Soltústik Qazaqstan oblysynan, 15 700 t - Qostanaı oblysynan jáne 6 500 t. Pavlodar oblysynan ákelindi. Sonymen qatar, 33 000 t sút jáne sút ónimderi Astanaǵa Ýkraına, Gollandııa, Belarýs pen Reseı Federatsııasynan ımporttaldy.
Et negizinen Astanaǵa Aqmola (13 227 t), Qaraǵandy (5 047 t) jáne Qostanaı (6 100 t) oblystarynan jetkiziledi. 3 000 tonnaǵa tarta et Avstralııa, Argentına, Polsha men Reseıden ákelindi.
