Ótken jyly elordada 62 kóp páterli turǵyn úı paıdalanýǵa berildi
ASTANA. 28 qańtar. QazAqparat - 2012 jyly Astanada 62 kóp páterli turǵyn úı, 130 jekemenshik úı jáne 152 áleýmettik mádenı-turmystyq nysan paıdalanýǵa berildi. Bul týraly qalalyq Máslıhattyń bıýdjet, ekonomıka, ónerkásip jáne kásipkerlik máseleleri boıynsha turaqty komıssııasynyń otyrysynda qalalyq Sáýlet jáne qala qurylysy basqarmasynyń bastyǵy Vıtalıı Sıletskıı málim etti, dep jazady elordanyń resmı saıty.
Sonymen qatar, basqarma bastyǵynyń aıtýynsha, ótken jyly 2 024 nysandy qaıta jabdyqtaý, qaıta josparlaý jáne jańartý jóninde sheshim shyqqan. 2012 jyly barlyǵy 1 020 eskız jobasy kelisilip, tirkeldi. Olardyń 55-i joǵary sapaly árleý jumystary materıaldarynyń joqtyǵynan keri qaıtarylyp alyndy. 1404 sáýlet-josparlaý ǵımaraty paıdalanýǵa berildi.
Sondaı-aq, Sáýlet jáne qala qurylysy basqarmasy 2004-2012 jyldary turǵyzylǵan turǵyn úı keshenderine tekserý júrgizdi. Tekserý barysynda elordanyń árbir aýdanyndaǵy ǵımarattar men turǵyn úılerdiń qasbetterin jóndeý men júrgizilgen tehnıkalyq jumystarǵa eskertýler jasalyp, olardy joıý usynystary aıtyldy. Nátıjesinde 29 turǵyn úıge jasalǵan eskertýler joıyldy.
Tekserý tek ǵımarattar men turǵyn úı keshenderine ǵana qatysty emes. Máselen, ótken jyly óz betinshe qorshap alǵan 79 fakti, zańsyz jazǵy dámhana turǵyzǵan 49 fakti anyqtaldy. Barlyq zań buzýshylyqtar týraly materıaldar tıisti shara alý úshin Aımaqaralyq jer qatynastary ınspeksııasyna joldandy.
V. Sıletskıı, sondaı-aq, Sáýlet jáne qala qurylysy basqarmasy azamattardyń aryz-shaǵymdaryna basa kóńil aýdaratyndyǵyn aıtty. Ótken jyly basqarmaǵa jeke jáne zańdy tulǵalardan 31 123 hat túsip, bul 2011 jylǵa qaraǵanda 123,3%-dy qurady. Basqarma bastyǵynyń jeke qabyldaýynda 488 azamat bolǵan.
