Ótken jyly elordada 45 jasyryn oıynhananyń qyzmeti toqtatyldy
ASTANA. 18 qańtar. QazAqparat /Aıdar Ospanalıev/ - Astana qalalyq Ekonomıkalyq qylmysqa jáne sybaılas jemqorlyqqa qarsy kúres departamentiniń ókilderi ótken jyly zańsyz oıynhana uıymdastyrýmen baılanysty 12 qylmystyń betin ashty. Bul áreketterden zańsyz alynǵan aqsha túrinde memleketke 155 mıllıon teńgege shyǵyn kelgen.
Bul týraly búgin atalmysh departamenttiń baspasóz hatshysy Tolqyn Nábıeva málim etti.
Ol keltirgen málimetter boıynsha, zańsyz oıynhanalarmen kúres baǵytynda 45 jasyryn oıynhananyń qyzmeti toqtatylyp, 301 oıyn avtomattary men 12 poker stoldary jáne 10 rýletka tárkilengen.
«Sonymen qatar qalada 9 oıynhana uıymdastyrǵan K.K.Beısembekov pen R.K.Beısembekovke qatysty qozǵalǵan qylmystyq ister aıaqtaldy. Atalmysh azamattar uıymdastyrǵan oıynhanalarda elektrondy rýletkalar men oıyn avtomattary bolǵan jáne onda aqsha tigilip, qumar oıyndar oınalǵan. Olar sonymen qatar jasyryn oıyn kazınosy, poker kartasy men rýletkaǵa arnalǵan stoldar qoıǵan. Osy oryndardy tekserý barysynda 15 mıllıon teńge men 2 myń eýro, 1,5 myń AQSh dollary kóleminde qolma-qol aqsha tabyldy»,-dedi baspasóz hatshysy.
Onyń sózine qaraǵanda, sot úkimimen K.K.Beısembekov 1 jylǵa bas bostandyǵynan aıyrylyp, R.K.Beısembekov shartty túrde 1 jylǵa bas bostandyǵynan aıyryldy.
