Ótken jyly elorda bıýdjetiniń kirisi artyǵymen oryndaldy
«2020 jyly qala bıýdjetine 696 mlrd 940 mln teńge qarjy tústi. Esep boıynsha jospar 35 mlrd 899 mln teńgege artyǵymen oryndaldy. Jeke kiristiń jıyntyq kólemi 361 mlrd 717 mln teńge nemese 11 paıyzdy quraıdy. Salyq boıynsha túsim 332 mlrd 479 mln teńgeni qurasa, al salyqtan bólek túsim 11 mlrd 796 mln teńgeni qurap, jospar artyǵymen oryndaldy. Sonymen qatar satýdan túsken negizgi kapıtal kólemi 17 mlrd 440 mln teńge nemese 2 mlrd 508 mln teńge qosymsha tabys tústi. Qala bıýdjetiniń kirisi negizinen salyq túsiminiń esebinen artyǵymen oryndalyp otyr», - dedi Álibı Jumaev elorda máslıhatynyń turaqty komıssııasynyń otyrysynda jasaǵan baıandamasynda.
Odan bólek, basqarma basshysy ótken jyly elordada jeke tabys salyǵynyń da artyǵymen oryndalǵanyn tilge tıek etti (122 mlrd 404 mln teńge) jáne áleýmettik salyqtyń jalpy kólemi 89 mlrd 521 mln teńgeni quraǵanyn aıtyp ótti.
«Sondaı-aq, 2020 jyly bizdiń basqarma otandyq bırja qorynda 93 mlrd 578 mln teńge turatyn memlekettik baǵaly qaǵaz shyǵarýdy uıymdastyrdy. Onyń 49 mlrd 548,6 mln teńgesi «Nurly jol» memlekettik baǵdarlamasyn júzege asyrý aıasynda úı salýdy qarjylandyrýǵa jumsaldy. Sol sııaqty 44 mlrd 30 mln teńge ótken jyly daǵdarysqa qarsy shara qoldaný aıasynda jol kartasyna quıyldy. Nátıjesinde 2020 jyly 2019 jylmen salystyrǵanda bıýdjettiń jeke kirisi 76 mlrd 66,6 mln teńgeni qurady, bul jeke kiristiń 26,6 paıyzǵa óskenin kórsetip otyr», - deıdi ol.
