Ótken jyly elorda bıýdjeti qanshalyqty tıimdi ıgerildi

NUR-SULTAN. QazAqparat – Búgin elorda máslıhatynyń turaqty komıssııa otyrysynda Nur-Sultan qalasynyń 2020 jylǵy bıýdjet qarajatynyń qanshalyqty tıimdi ıgerilgeni qorytyndylandy, dep habarlaıdy QazAqparat tilshisi.

«Ótken jyl elorda úshin ekonomıka salasynyń keıbir túrine teris áserin tıgizgenine qaramastan, qalanyń makroekonomıkalyq jaǵdaıy turaqty boldy deýge bolady. Aldyn ala málimetke sáıkes 2020 jyldyń 9 aıy boıynsha Nur-Sultan qalasynyń JІÓ (jalpy ishki ónim) 5 mlrd teńgeni qurady. Al respýblıkalyq deńgeıde elordanyń úlesi 209 paıyzdy qurap, Almaty qalasy men Atyraý oblysynan keıin úshinshi orynda turmyz. Elordada JІÓ adam basyna shaqqanda 4,3 mln teńgeni qurap otyr», - dedi Nur-Sultan qalalyq revızııa komıssııasynyń tóraǵasy Imanjúsip Aqpombaev máslıhat otyrysynda.

Onyń aıtýynsha, ótken jyly qalanyń bıýdjet kirisi 661 mlrd teńgeni quraǵan.

«Qala bıýdjeti qarajatyn sapaly ıgerýde debıtorlyq jáne nesıelik bereshek áser etti. Ótken jyl boıynsha debıtorlyq bereshektiń kólemi 44,6 mlrd teńge boldy. Degenmen debıtorlyq bereshektiń ótelmeý deńgeıiniń saqtalýy da baıqalady. Aıtar bolsaq, 2020 jyldyń 9 aıy boıynsha Nur-Sultanda debıtorlyq bereshek 35 mlrd teńgeni quraǵan bolatyn», - deıdi ol.

Buǵan deıin qalalyq revızııalyq komıssııanyń tóraǵasy Imanjúsip Aqpombaev bıýdjet qarjysyn tıimdi josparlap, jumsaý maqsatynda elordany kógaldandyrý strategııasyn ázirleý týraly usynys bildirgen bolatyn.