Ótken jyly elimizde asa qaýipti 15 uıymdasqan qylmystyq toptyń joly kesilgen

ASTANA. QazAqparat - Quqyq qorǵaý organdarymen birlese otyryp, júrgizilgen jumystardyń arqasynda elimizdegi krımınogendik jaǵdaı aıtarlyqtaı ońaldy.

Bul týraly búgin Memleket basshysy Qasym-Jommart Toqaevqa 2022 jyly atqarylǵan jumystardyń barysymen tanystyrǵan QR Ulttyq qaýipsizdik komıtetiniń tóraǵasy Ermek Saǵymbaev málim etti, dep habarlaıdy QazAqparat.

«Asa qaýipti 15 uıymdasqan qylmystyq top quryqtalyp, olardyń 56 basshysy jáne belsendi músheleri ustaldy. 1 100-den astam qarý, 598 granata jáne 31 860 oq-dári zańsyz aınalymnan shyǵaryldy. Tárkilengen qarýdyń jartysyna jýyǵy qańtar oqıǵasy kezinde urlanǵan»,-dedi Ermek Saǵymbaev.

Sondaı-aq ol keltirgen málimetterge qaraǵanda, jyl boıyna esirtkige qarsy 130 operatsııa júrgizildi, 1,3 tonna ártúrli esirtki tárkilendi. Sheteldik seriktestermen birge 96 halyqaralyq jáne óńirlik esirtki jetkizý arnasy joıyldy.

Sıntetıkalyq esirtki óndirisimen aınalysqan 28 zerthana joıyldy. 32 zańsyz kóshi-qon arnasynyń joly kesilip, olardy uıymdastyrýshylarǵa qatysty 12 qylmystyq is qozǵaldy.

Osyǵan deıin QR Ulttyq qaýipsizdik komıteti ókilderiniń ótken jyly 3 terrorlyq aktige daıyndyq kezeńinde tosqaýyl qoıylǵanyn jazdyq.