Ótken jyly elimizde 400 myńdaı sábı dúnıege keldi
ASTANA. QazAqparat - Ótken jyly elimizde 400 myńdaı sábı dúnıege keldi. Bul táýelsizdik jyldaryndaǵy mejeden arta túskenin kórsetedi.
Memleket basshysy Nursultan Nazarbaev Qazaqstan halqyn jańa 2016 jylmen quttyqtaýynda 2015 jyly elimizde 400 myńdaı sábıdiń dúnıege kelgenin atap ótti. Elbasy barlyq qazaqstandyq otbasylardy Bolashaǵy Birtutas Eldiń osynaý jańa urpaǵynyń ómirge kelýimen quttyqtady. «Solar úshin jáne ósip kele jatqan myńdaǵan qazaqstandyqtar úshin biz jańa mektepter men balabaqshalar, turǵyn úıler men aýrýhanalar, joldar men kásiporyndar, stadıondar men kontsert zaldaryn saldyq. Barlyq qazaqstandyqtyń baqyty úshin biz birligimizdi árqashanda saqtaıtyn bolamyz!» - deı kelip, Memleket basshysy eldiń barsha turǵynyna beıbitshilik, kelisim jáne bizdiń týǵan Otanymyzdyń órkendeýi jolyndaǵy jasampaz eńbekteri úshin alǵysyn bildirdi.
Eldiń damýy, ekonomıkalyq-áleýmettik jaǵdaıdyń jaqsarýy árbir jas otbasynda da bala sanynyń ósýine tikeleı áser etetini anyq. Elimizde bala týý sany jyl saıyn arta túsýde.
Atap aıtar bolsaq, 2010 jyly Qazaqstanda 366 myń sábı ómirge kelse, 2012 jyly el azamattarynyń otbasynda dúnıege kelgenderdiń sany 381 myńǵa jetti. Statıstıka komıtetiniń málimetine súıensek, 2014 jyly elimizde 368 myń sábı dúnıege kelipti.
2016 jyly elimizde dúnıege keletin balalardyń sany ótken jylǵy mejeden de asyp túsýi yqtımal. Táýelsiz memleketimizdegi oń ózgerister, jastardyń keshelekke degen seniminiń nyǵaıýy, jas otbasylardyń jaǵdaıynyń jaqsara túsýi bala sanynyń ósýine yqpal etedi deýge negiz bar.
Tipti sarapshylardyń deregine súıensek, Qazaqstanda táýligine 800-ge jýyq (766) bala dúnıege keledi eken. Endeshe, 2016 jyldyń enshisinde 366 kúnniń bar ekenin de eskergenimiz jón.
Beıbit ómirdi qalaıtyn Qazaqstannyń barsha halqy Táýelsizdigimizdiń 25 jyldyǵy jemisti de jeńisti bolatyna senedi.
