Ótken jyly elimizde 3 aýysymda bilim beretin mektep sany 16-ǵa qysqardy
ASTANA. Mamyrdyń 17-si. QazAqparat /Aıdar Ospanalıev/ - Ótken jyly eldegi 3 aýysymmen oqytatyn mektepter sany 16-ǵa qysqardy. Bul týraly búgin Parlament depýtattaryn 2009 jylǵy bıýdjettiń atqarylýymen tanystyrǵan Qarjy mınıstri Bolat Jámishev málim etti,
dep habarlaıdy QazAqparat.
Onyń derekteri boıynsha, elde búgin 7 myń 576 jalpy bilim berý mektepteri bar. Onda 2 mıllıon 491 myń 202 bala 5 tilde bilim alady. «Memleket basshysynyń bıylǵy Joldaýynda kórsetilgen memlekettik til saıasatyn júzege asyrýǵa qatysty mindetterdi oryndaý maqsatynda erekshe daryndy balalarǵa arnalǵan 3 tilde bilim beretin 33 arnaıy mamandandyrylǵan mektepter jelisi quryldy. Sondaı-aq Memleket basshysynyń fızıka-matematıkalyq baǵyttaǵy Astana, Semeı, Kókshetaý qalalaryndaǵy úsh ıntellektýaldy mektepterinde búginde 1 myń 854 bala bilim alyp jatyr», dedi B.Jámishev.
Sondaı-aq onyń aıtýynsha, jalpy jáne orta bilim berý oryndaryn arnaıy tehnıkalarmen qamtamasyz etý maqsatynda mýltımedııalyq kabınetterdi qosa eseptegende 18 oqýshyǵa 1 kompıýterden keledi. Al ınternet jelisine qala mektepteriniń 98 paıyzy, aýyl mektepteriniń 97 paıyzy qosylǵan.
