Ótken jyly DDSU Qazaqstandy «bezgekten jáne polıomıelıtten tazarǵan el» retinde tanydy - S.Qaıyrbekova
ASTANA. 19 naýryz. QazAqparat - Ótken jyly Dúnıejúzilik densaýlyq saqtaý uıymy Qazaqstandy «bezgekten jáne polıomıelıtten tazarǵan el» retinde tanydy. Bul týraly búgin Úkimettiń selektorlyq rejimdegi otyrysynda 2012 jyldyń qorytyndysy boıynsha «Salamatty Qazaqstan» memlekettik baǵdarlamasynyń iske asyrylý barysy týraly baıandama jasaǵan QR Densaýlyq saqtaý mınıstri Salıdat Qaıyrbekova aıtty.
«2012 jyly Úkimet Onkologııalyq kómekti damytýdyń 2011-2016 jyldarǵa arnalǵan baǵdarlamasyn bekitti. Jalpy alǵanda onkologııalyq qyzmettiń bıýdjeti 2,2 esege, dári-dármekpen qamtamasyz etý 1,7 esege ósti. 2012 jyly Dúnıejúzilik densaýlyq saqtaý uıymy Qazaqstandy «bezgekten jáne polıomıelıtten tazarǵan el» retinde tanydy», - dedi ol.
Mınıstrdiń sózine qaraǵanda, 2012 jyly Biryńǵaı ulttyq densaýlyq saqtaý júıesin engizý aıaqtaldy. Patsıenttiń statsıonardy erkin tańdaýy múmkin boldy. Osy quqyqty paıdalanǵan turǵyndar 2,5 ese artyp, onyń ishinde aýyl turǵyndarynyń úlesi ósti. Mamandandyrylǵan kómek kóleminiń 6, joǵary mamandandyrylǵan kómektiń kólemi 20 paıyzǵa óskeni baıqalady. «Búginde biryńǵaı ulttyq densaýlyq saqtaý júıesin turaqty engizý elimizdiń óńirlerinde joǵary tehnologııalardy damytýǵa múmkindik berdi», - dedi S.Qaıyrbekova.
