Ótken jyly daýyldan zardap shekken «Alataý» balalar shıpajaıy kúrdeli jóndeýden keıin qaıta ashylady
ASTANA. 12 jeltoqsan. QazAqparat - QR Táýelsizdigi kúnine oraı erteń «Alataý» respýblıkalyq balalar klınıkalyq shıpajaıy elimizdiń barlyq óńirleriniń balalary úshin qaıtadan esigin aıqara ashady. Saltanatty sharaǵa QR Densaýlyq saqtaý mınıstrliginiń jaýapty hatshysy Serikbol Mýsınov qatysady, dep habarlady atalǵan vedomstvonyń baspasóz qyzmetinen.
Ótken jylǵy qatty daýyldan «Alataý» shıpajaıyna eleýli nuqsan kelip, ǵımarattyń tóbe jabyndysy men qyzmettik ǵımarattar qırap, terezeler synǵan bolatyn. Odan keıin úsh kún boıy jaýǵan jańbyrdan ǵımarattyń ishi de jaramsyz kúıge tústi. Shıpajaı aýmaǵynda jasyl jáne Tıan-Shan shyrshalary, qaraǵaı, qaıyń, emen, terek jáne ózge de 150-ge tarta aǵash sulady.
Respýblıka Úkimeti men Densaýlyq saqtaý mınıstrliginiń jedel sharalary arqasynda shıpajaıdy kúrdeli jóndeýden ótkizýge qajetti qarajat bólindi. Qazirgi ýaqytta ǵımarat tolyqtaı jóndeýden ótti, seısmıkalyq jaǵynan kúsheıtildi jáne kólemi qosymsha 600 sharshy metrge ulǵaıtyldy. Jańa qural-jabdyqtar satyp alynyp, balalardy saýyqtyrý múmkindikteri arta tústi. Balalar jatyn jáne oıyn bólmelerine jańa jıhazdar satyp alynyp, emdeý dene shynyqtyrý bólmeleri jańartyldy.
«Alataý» shıpajaıynda jyl saıyn sozylmaly tynys alý, asqazan-ishek joldary, nesep júıesi organdary, qant dıabeti sııaqty aýrýlarǵa shaldyqqan 1,5 myńnan astam bala keshendi em alady.
2013 jyldan bastap shıpajaıda onkogematologııalyq patologııasy bar balalar da emdeýden jáne ońaltýdan ótetin bolady.
