Ótken jyly bıýdjet qarajaty esebinen 83 naýqas úzdik shetel klınıkalarynda emdeldi

Bul ótken jyldyń kórsetkishterimen salystyrǵanda 51 paıyzǵa kóp, dep habarlady atalǵan vedomstvonyń baspasóz qyzmetinen. Mınıstrliktiń aqparatyna sáıkes, el azamattary negizinen Germanııa, Avstrııa, Izraıl, Túrkııa, Ońtústik Koreıa, Belarýs jáne Reseıdiń úzdik klınıkalarynda emdeldi. Olardyń ishinde 18 jasqa deıingi balalardyń sany - 36, ıaǵnı barlyq jiberilgenderdiń - 44 paıyzy. 83 naýqastyń 20-sy, ıaǵnı 22 paıyzy qan aýrýlaryna baılanysty kemik maıyn transplantatsııalaýǵa jiberildi. Aıta keterligi, otandyq klınıkalardyń da joǵary tehnologııalyq medıtsınalyq qyzmetter usynýǵa áleýeti jetkilikti. Sheteldiń úzdik klınıkalarymen jáne mamandarymen baılanys ta jolǵa qoıylǵan. Sonyń nátıjesinde donor tabylǵan naýqastar sheteldik mamandardyń kómegimen otandyq aýrýhanalarda emdele bastady. Aıtalyq, «Ulttyq ǵylymı medıtsınalyq ortalyq» AQ bazasynda Ońtústik Koreıadan mamandardy shaqyra otyryp, 4 eresek naýqasqa týys donordan baýyr almastyryldy. «Ana men bala ulttyq ǵylymı ortalyǵynda» bir balaǵa týys donordan búıregin tranplantatsııalaý otasy sátti jasaldy. Ulybrıtanııalyq professor Pıter Roland Eılıftiń qatysýymen taǵy bir syrqat balaǵa jasalǵan «Aýyz jutqynshaǵyndaǵy tereń jarany plastıkalaý. Rekonstrýktıvtik rınoplastıka» operatsııasy sátti aıaqtaldy. «Jedel medıtsınalyq járdem respýblıkalyq ǵylymı ortalyǵy» AQ bazasynda 6 jasar balaǵa týys donordan baýyr tranplantatsııalandy. Osy ortalyqta shetelderden tıisti mamandar shaqyryla otyryp, bir áıelge kemik maıynyń allogendik tranplantatsııasy jasaldy. QR Densaýlyq saqtaý mınıstrligi eń úzdik álemdik tájirıbelerdi belsendi túrde engize otyryp, shetelderge jiberilýi tıis naýqastardy otandyq klınıkalarda emdeýge yntalandyrý sharasyn ári qaraı jalǵastyra beredi.