Ótken jyly aýyl sharýashylyǵyna 573 mlrd teńge ınvestıtsııa salyndy

NUR-SULTAN. QazAqparat – 2020 jyly mal sharýashylyǵy ónimi 3 paıyzǵa artyp, 2,6 trln teńgege jetti. Bul týraly Úkimet otyrysynda QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«2020 jylǵy qańtar-jeltoqsanda agroónerkásiptik keshen salasynda ósýdiń oń dınamıkasy saqtaldy. Atalǵan kezeńde jalpy aýyl sharýashylyǵy óniminiń kólemi 5,6 paıyzǵa ulǵaıyp, 6,3 trln teńgeni qurady. Bul ósim negizinen ósimdik sharýashylyǵyndaǵy óndiris kóleminiń 7,8 paıyzǵa ulǵaıýy esebinen qamtamasyz etildi. 5 oblysta, atap aıtqanda Qostanaıda – 120,8, Aqmolada – 112,7, Pavlodarda – 107,5, Aqtóbede – 106,7 jáne Qaraǵandyda 105,7 paıyz respýblıkalyq deńgeıden joǵary qarqyn baıqaldy», -dedi ol.

Mınıstrdiń aıtýynsha, mal sharýashylyǵy óniminiń jalpy kólemi kórsetilgen kezeńde 3 paıyzǵa ulǵaıyp, 2,6 trln teńgeni qurady. Bul rette tirideı salmaqtaǵy et óndirý kólemi 4,1, sút 3,2 paıyzǵa ulǵaıdy. Esepti kezeńde tamaq ónimderin óndirý kólemi 4 paıyzǵa ósip, 1,9 trln teńgeni qurady. Atap aıtqanda, sary maıdy óndirý kóleminiń 26,5, óńdelgen kúrishtiń 20,1, shujyq ónimderiniń 8,2, makaronnyń 6,3, óndelgen súttiń 4,9, qyshqyl sút ónimderiniń 4,8, irimshik jáne súzbeniń 4,5, unnyń 1,6 paıyzǵa artqany baıqaldy.

«2020 jyldyń 12 aıynda aýyl sharýashylyǵynyń negizgi kapıtalyna salynǵan ınvestıtsııalar 15 paıyzǵa ulǵaıyp, 573,2 mlrd teńgeni, tamaq ónimderi óndirisine salynǵan ınvestıtsııalar 13,5 paıyzǵa ósip, 104 mlrd teńgeni qurady», - dedi Saparhan Omarov.