Ótken jyly aýyl halqynyń syrqattaný deńgeıi 3,5 paıyzǵa tómendedi - QR DSM
ASTANA. 11 shilde. QazAqparat - Búgin QR Densaýlyq saqtaý mınıstrliginde óńirlerdiń densaýlyq saqtaý basqarmalary, komıtet departamentteri, respýblıkalyq densaýlyq saqtaý uıymdary jetekshileriniń qatysýymen alqa májilisi ótti.
Atalǵan mınıstrlik baspasóz qyzmetiniń habarlaýynsha, onda aýyldyq densaýlyq saqtaý salasynyń jáne jedel medıtsınalyq járdem qyzmetiniń jaǵdaıy men damý perspektıvalary talqylandy.
«Alqa májilisinde sońǵy jyldary elimizde aýyl halqynyń densaýlyq jaǵdaıy, densaýlyq saqtaýdyń materıaldyq-tehnıkalyq bazasy, kórsetiletin medıtsınalyq kómektiń qoljetimdiligi men sapasy aıtarlyqtaı jaqsarǵany atap kórsetildi. Qazir aýyl halqynyń sany birshama ulǵaıyp, sońǵy bir jyldyń ishinde 8 myń adamǵa artty. Jalpy, respýblıka boıynsha aýyldyq jerlerde 7,5 mln.-nan astam adam turady»,- delingen habarlamada.
Vedomstvonyń atap ótýinshe, 2011 jyldyń qorytyndysynda aýyl halqynyń jalpy syrqattaný deńgeıi 2010 jylmen salystyrǵanda 3,5 paıyz tómendedi. Osy merzim ishinde aýyl turǵyndarynyń týberkýlezben syrqattanýy jáne ólim-jitim kórsetkishi 9 jáne 21 paıyzǵa, onkologııalyq aýrýlarǵa shaldyǵýy 11 jáne 7 paıyzǵa, qaıǵyly jaǵdaılar, jaraqattanýshylyq jáne ýlanýdan bolatyn syrqattaný jáne ólim-jitim kórsetkishi tıisinshe 5 jáne 5,5 paıyzǵa azaıǵany baıqalady. Qan aınalymy júıesi aýrýlarynan bolatyn ólim-jitim 27 paıyzǵa tómendedi.
