Ótken jyly Astanaǵa jarty mıllıonǵa jýyq týrıster kelip qaıtty
ASTANA.6 qańtar. QazAqparat - Astana qalalyq Sport, dene shynyqtyrý jáne týrızm basqarmasynyń aldyn ala aqparattary boıynsha ótken jyly Qazaqstannyń Bas qalasynda 522,9 myń týrıst bolyp qaıtqan. Onyń ishinde 117,5 myń adam sheteldik týrıster bolsa, 405,4 myń adam elimizdiń basqa óńirlerinen kelgenderdi qurap otyr.
Salystyrmaly túrde qaraǵanda, elordaǵa kelgen týrıster sany 2011 jyly 105,9 myń sheteldikter men 373,1 basqa óńir turǵyndaryn quraǵan bolatyn. Osylaısha, bir jyl ishinde Astanaǵa kelgen týrıster sany 43,9 myń adamǵa nemese 9,2 paıyzǵa artyp otyr.
Ákimdiktiń baspasóz qyzmetiniń habarlaýynsha, Astanadan basqa aýmaqtarǵa shyqqan týrıster sany da arta túsip, bul 2011 jyly 24,2 myń adamdy qurasa, 2012 jyly 27,3 myń adamǵa jetip, 12,8% artqan. «Jalpy elordaǵa kelýshiler sanynyń ornyqty artýyn qonaq úılerdegi suranystyń udaıy artyp otyrýymen túsindirýge bolady. Máselen, eger 2009 jyly bul kórsetkish 28,5%, al 2010 jyly - 31,2%, 2011 jyly 42% paıyzǵa artqan. Al 2012 jyldyń alǵashqy jartyjyldyǵynda bul 49% ósti. Bul rette atalǵan kórsetkish Astanadaǵy qonaq úı resýrstarynyń udaıy keńeıip otyrǵanyna qaramastan artyp otyrǵanyn da eskerý qajet», delingen habarlamada.
Málimetterge súıensek, búgingi tańda elordada 172 qonaq úı qyzmet kórsetse, olardyń nómirlik qory 5124-ti qurap, 7162 orynǵa teń bolyp otyr.
Týrızmniń oń serpini kóp rette jergilikti atqarýshy organdar men týrızm salasyndaǵy úkimettik emes uıymdardyń tabysty birlesken qyzmetiniń arqasynda múmkin bolyp otyr. Búgingi tańda qalada 169 týrıstik fırma jumys jasaıdy. Astanany halyqaralyq týrıstik naryqta ilgeri jyljytý úshin olar halyqaralyq jáne aımaqtyq týrıstik kórmelerge belsendi tartylýda, dep habarlady baspasóz qyzmeti.
