Ótken jyly apat bolǵan aýylda jańa jylý qazandyǵy iske qosyldy
Qazandyq qurylysy «Óńirlerdi damytý-2020» baǵdarlamasy boıynsha júzege asyryldy. Jobanyń quny 123,6 mıllıon teńgeni qurady. Jańa blokti-modýldi (BMK-6) qazandyq kóppəterli turǵyn úı, əleýmettik, ákimshilik nysandardy jylytady. Nysan okrýg ákimdiginiń balansynda.
Eske sala keteıik, osyǵan deıingi qazandyq «Ardager Nerýd» JShS menshiginde bolǵan edi. Ótken jyldyń kúzinde jylý berý maýsymynyń basynda atalmysh jylý qazandyǵynda tótenshe jaǵdaı oryn alyp, jylý berý birneshe kúnge ýaqytsha toqtatylǵan bolatyn. Osyǵan oraı sol kezde aımaq basshysynyń tapsyrmasy boıynsha keleńsizdikti joıýǵa oblys jəne aýdan ortalyǵyndaǵy kommýnaldyq kásiporyndardyń 15 mamany jumyldyrylyp, eki bý qazandyǵy ornatylǵan edi. Bıyl sol olqylyqtar túbegeıli joıylyp, jańa qazandyq iske qosylyp otyr.
