Ótken jyly Almaty kedenshileriniń kómegimen 70 qylmystyq jáne 697 ákimshilik is qozǵalyp, 48 mln. teńge kóleminde aıyppul tólengen
ALMATY. 15 qańtar. QazAqparat /Ádilet Musahaev/ - Taýarlar men kólik quraldarynyń zańsyz tasymaldanýyna baǵyttalǵan byltyrǵy kúres sharalary úlken nátıjelerge qol jetkizdi.
Qorytyndysynda 70 qylmystyq jáne 697 ákimshilik is qozǵalǵan. 48 mln. teńge kóleminde aıyppul tólenip, 30 mln. teńgeniń taýary tárkilengen. Bul jaıynda QazAqparat agenttigine Almaty qalasy keden baqylaý departamentiniń halyqaralyq qatynastar bóliminiń bastyǵy Ǵazıza Qýandyqova málim etti.
Sonymen qatar ótken jyly sheteldik iri valıýtany, zergerlik buıymdardy jáne esirtki zattaryn zańsyz kirgizip, shyǵarǵan jaǵdaılar aıqyndalǵan. Almatydaǵy halyqaralyq áýejaıdan 2010 jyly deklaratsııalanbaǵan nemese shekaralyq kedennen alyp ótýge shekteý qoıylǵan 696 myń AQSh dollarynan asa jáne 173 myń eýro, 40 myń qytaı ıýany men basqa da sheteldik valıýtalardy alyp ótpek bolǵan oqıǵalar tirkelgen.
Sondaı-aq 62 keliden asa zergerlik buıymdar, 393 túrli kollektsııalyq tıyndar, segiz ań terisinen jasalǵan zattar men kymbat metaldan jasalǵan alty kollektsııa túrindegi qarý tárkilengen. Oǵan qosa, qaýipsizdik organdarynyń arnaıy ruqsatyn talap etetin beınekamerasy bar tehnıkalyq zattardy alyp ótý jaǵdaıy da tirkelgen.
Buryn habarlaǵanymyzdaı, 2010 jyldyń qorytyndylary boıynsha Almaty qalasy boıynsha keden baqylaý departamenti kedendik tólemder men salyqtan alty mıllıard teńge kóleminde qarajat túsirip, QR qarjy mınıstrliginiń josparly tapsyrmasyn asyra oryndaǵan.
